31 Qazan 2019, 10:21 912 0 Ádebıet Ahmet ÓMIRZAQ

Sóz óneriniń patrıarhy

Ár dáýirde joǵarǵy marapattarǵa laıyq azamattar bolady, olar eli úshin eńbek etip, sol arqyly ultynyń, mem­le­ketiniń damýyna, álem­ge ataǵy aspandap, mártebesiniń kóteri­lýi­ne zor paıdasyn tıgizedi. Qazaq degende eske túsetin sondaı degdar azamattyń biregeıi – ulttyq ádebıetimizdiń klassıgi, asa kórnekti jazýshy Ábdijámil Nurpeıisov.

Ábdijámil Kárimuly qazaq kór­kemsózin jańa deńgeıge kó­ter­gen asa daryndy tulǵa. Hat tanyǵan kúlli qazaqqa ǵana emes, aty da, shy­ǵar­malary da alys-jaqyn elderge keńinen tanylǵan. «Kútken kún», «Qan men ter», «Sońǵy paryz» sekildi roman­da­ry áldeneshe ret basylyp shyǵyp, dá­rejesi bıik ádebı syılyqtarǵa ıe bol­dy. Shyǵarmalary álemniń irgeli el­derine qazaq ádebıetiniń qýatyn tanytty.

Romandary jer júziniń 40-qa jýyq tilderine aýdarylyp, kóp tara­lym­men oqyrmandar qolyna tıgen qazaq jazý­shysynyń ózgeshe talant qudiretin aty dúnıejúzine belgili kóp­te­gen qalam­ger­ler joǵary baǵalady.

Bıikke bıiktiń kózi túsedi. Qazaq qalamgerleri arasynda shyǵarmalary tuńǵysh ret Nobel syılyǵyna úmit­ker retinde usynylǵan da osy Ábdi­já­mil Nurpeıisov.

Bıyl Qazaqstannyń Halyq jazý­shy­sy Ábdijámil Nurpeıisov 95 jasqa tolyp, qalamger mereıtoıy elimizde keń túrde atalyp ótýde. Osyǵan oraı Qazaqstan Prezıdenti Qasym-Jomart To­qaev Ábdijámil Nurpeıisovti qabyl­dap, onyń óńirine «Qazaqstannyń Eńbek Eri» ataǵynyń «Altyn juldyz» belgisin taqty. Bul – Memleket basshy­sy­nyń qazaq ádebıetine degen úlken qur­meti edi.

«Siz halqymyzǵa kereksiz. Son­dyq­tan sizge zor densaýlyq, uzaq ǵumyr, shy­ǵarmashylyq tabys, baq-bereke tileımin», – dedi Qazaqstan Prezıdenti Qasym-Jomart Toqaev kórnekti qazaq qalamgeriniń omyraýyna «Altyn juldyz» belgisin taǵyp jatyp.

Óz kezeginde Ábdijámil Nurpeıisov te Qasym-Jomart Toqaevqa rızalyǵyn bil­dirip, alǵys aıtty jáne Qazaq­stan­dy álemniń aldyńǵy qatarly elderi qataryna qosý jolyndaǵy istep jat­qan eńbegine tabys tilep, tilek­testigin bildirdi.

Ábdijámil Nurpeıisov – belgili ǵalym, kórnekti qalamger Myrzataı Jol­dasbekov aıtpaqshy, «Búginderi dú­nıelik ádebıettiń tańdaýly sheber­le­riniń birine aınaldy. Ulttyq salt-dás­túrdiń ýyzyna jaryp ósken, máıekti tili­men tebirene biletin, oqyrmandy da tebirente júretin sóz zergerimen za­mandas bolǵanymyzǵa myń márte táý­be aıtamyz. Aǵaǵa qarap pań­da­na­myz! Aǵaǵa qarap bıikteımiz! Bala­daı erkeligimiz ustaıdy. Shúbásiz shyndyq: Ábdijámil Nurpeıisov kitap oqıtyn árbir qazaqtyń júreginiń tórinde, týǵan halqymen birge jasaı beredi».

 

Sońǵy jańalyqtar