21 Qazan, 12:45 372 0 Ekonomıka Anar LEPESOVA

Qus etiniń baǵasy sıyr etimen teńesedi

Elimizde qus etiniń baǵasy sıyr etimen teńesýi múmkin. Mamandar muny saladaǵy sýbsıdııanyń qysqarǵanymen baılanystyrady, dep habarlaıdy «Habar 24».

Sýbsıdııa bolmaǵandyqtan birneshe óńirdegi qus fabrıkasy óndiris kólemin tómendetedi nemese taýyq etiniń baǵasyn ósiredi. Problemany sheshýdiń taǵy bir joly bar. Qazaqstan Qus ósirýshiler odaǵynyń prezıdenti Rýslan Sháripovtyń paıymdaýynsha, aldaǵy ýaqytta birneshe óńirdiń qus fabrıkalaryna óndiris kólemin azaıtýǵa týra keledi. Olardyń qatarynda sońǵy jarty jylda sýbsıdııa almaǵan Almaty, Aqmola, Shyǵys Qazaqstan oblystarynyń kásiporyndary bar.

«Óndiriske qajetti dárýmender men dári-dármek shetelden alynady. Barlyǵy 19 atalym bar. Eger olardyń quny ónim baǵasyna qosylsa, qus eti sıyr nemese qoı etimen birdeı bolady. «Sondyqtan qus ósirýshiler sýbsıdııaǵa táýeldi», - deıdi Rýslan Sháripov.

Baǵanyń qubylýyna astyqtyń qymbattaýy da áser etken. Degenmen, kásipkerler «jem-shóp qoryn qurý arqyly problemany sheshýge bolady» degen oıda. Bıyl sala ókilderi Úkimetke 300 myń tonna astyq alyp, ony jyl boıy bekitilgen baǵamen satýdy usynǵan. Bul qus fabrıkalaryna qajetti jem shóptiń jartysy. Aıta keteıik, 2019 jyldyń segiz aıynda elimizde 142 myń tonnadan astam taýyq eti men 3,7 mlrd dana jumyrtqa shyǵarylǵan.

Sońǵy jańalyqtar