16 Qazan, 21:41 270 0 Áleýmet Anar LEPESOVA

Nursultandyqtardyń sýǵa bereshegi 1 mlrd teńgege jýyqtady

Elordalyqtardyń sýǵa qaryzy mıllıardqa jýyqtaǵan. Bereshegi kóbeıgender qatarynda qurylys kompanııalary men jeke kásipkerler de bar. Bul týraly "Astana sý arnasy" kompanııasy habarlady.

Kommýnaldyq sala qyzmetkerleri ózderine tıesili aqshany alý úshin sý men káriz júıesinen ajyratý jazasyn qoldana bastady.  Jataqhananyń komendanty búgin tekserýshilerdi kútpese kerek. Sýǵa qaryzy 2 mıllıon teńgeden asqan turǵyn ıesine habarlasyp shaqyra bastady. Munda barlyǵy júzge jýyq páter jaldaýshylar turady.

"Ýaqtyly tólemeıdi, sol sebepti, búgin biz qosqabatty úıdi sýmen qamtamasyz etý júıesinen ajyrattyq", – deıdi "Astana sý arnasy" kompanııasynyń tehnıgi Kúlshe Saıfýlına.

Myna qosqabatty jer úıdiń ıesi de sýdy paıdalanǵan úshin aqysyn tóleýge asyǵar emes. Kommýnaldyq sala qyzmetkerleri birneshe márte úıdi sýdan ajyratqan. Alaıda, zań buzýshyǵa bul shara áser etpegen kórinedi. Bereshegi 180 myńnan asyp ketken.

Revızorlardyń aıtýynsha, kóbine adamdar úılerinde bolmaıdy nemese esikti qasaqana ashpaıdy. Al jazbasha jiberilgen eskertýdi tipti elemeıdi eken. Úı ıeleri tarapynan eshqandaı áreket bolmaǵan soń sýdy buǵattaýǵa týra keledi.

"Biz kassalyq apparatty turǵyndardyń yńǵaıy úshin alyp júremiz. Bir jerden ekinshi jerge baryp júrmeı, birden bizge tóleý úshin. Alaıda qaryzǵa belshesinen batqandar bul múmkindikti de paıdalanbaıdy", – deıdi "Astana sý arnasy" kompanııasynyń baqylaýshysy Áıgerim Boranbaeva.

Elordada sý men kárizdi tutynýshylardyń jalpy qaryzy mıllıard teńgeden asqan. Onyń jarty mıllıonǵa jýyǵy bankrotqa ushyraǵan qurylys kompanııalary men mekemelerge tıesili. Al jeke tulǵalardyń bereshegi 300 mln teńgege jetken.

«Shatyr arqyly arnaıy qurylǵymen káriz júıesin tolyq jabamyz. Sosyn páter ishinde tutynýshy sýdy qoldana almaıdy. Óıtkeni sý aqpaı turyp qalady», – deıdi «Astana sý arnasy» kompanııasynyń abonenttik ýchaske bastyǵy Tatıana Strelchenko.

Mamandar qaryzdy birden ónidirip alý múmkin emestigin aıtady. Alaıda, boryshkerlerdiń uıaty oıanbaǵansha, elordada bul reıd jalǵasa bermek.

 

Sońǵy jańalyqtar