13 Qazan, 18:53 311 0 Nur Otan Anar LEPESOVA

Almatydaǵy eń úlken kók baıraq Medeýde jelbiredi

«Medeý» muz aıdynynyń mańyna Almatydaǵy elimizdiń eń úlken Týy tigildi. Kók baıraqty kóterý saltanatyna esimderi elge belgili sportshylar men qaladaǵy jastar uıymdarynyń ókilderi qatysty.
«Memlekettik týymyzdy Almatynyń tórinde jelbiretýimizdiń erekshe máni bar. Elbasy aıtqandaı, Almaty – Táýelsizdiktiń altyn besigi. Osy jerde Elbasy, elimizdiń Tuńǵysh Prezıdenti Nursultan Nazarbaev Táýelsizdigimizdi jarııa etip, qasterli memlekettik rámizderimiz, Ata zańymyz ben ulttyq teńgemiz qabyldandy. Al «Medeý» – elimizdiń jáne sheteldik talaı sport sańlaǵynyń álemdik rekordyna kýá bolǵan ásem de, dańqty meken. Dál osy jerde Azııada jáne Ýnıversıada ótkenin bilesizder. Memleket basshysy Qasym-Jomart Toqaev aıtqandaı, «Kók baıraǵymyz kókke kóterilgende, elimiz úshin, Táýelsizdiktiń arqasynda qol jetkizgen barlyq jetistikterimiz úshin keýdemizdi maqtanysh sezimi kerneıdi». Eltańbamyz eldik ben erkindikten bastaý alǵan rýhymyzdy aspandatyp, aıbynymyzdy asyra tússin! Áýezdi Ánuranymyz máńgi shyrqalyp, arman-ańsarymyzdy kókke samǵata bersin! Baıtaq Otanymyz, qasıetti Qazaq eli kún sóngenshe sónbesin! Árqashan kók Týymyz kógimizde jelbireı bersin», - dedi «Nur Otan» partııasy Tóraǵasynyń Birinshi orynbasary Baýyrjan Baıbek.
Saltanatty sharada sóz alǵan Olımpıada chempıony Jaqsylyq Úshkempirov sporttyń arqasynda dúnıe júziniń talaı jerin aralaǵanymen, Qazaqstannan artyq meken joq ekenine kózi jetkenin aıtty.
«Keń baıtaq Qazaq jerin álemge tanytatyn, memleketimizdi aldyńǵy qatarly el etetin de sendersińder. Dańqty sportshylarymyzdyń jolyn jalǵap, shetelderde Ánuranymyzdy shyrqatyp, kók baıraǵymyzdy jelbiretetin de ózderiń. Sondyqtan  Táýelsizdigimizdiń tuǵyrly bolýyna barlyǵymyz bir kisideı atsalasaıyq!» - dedi ardager sportshy.
Aıta ketý kerek, elimizdiń Ulttyq Basketbol federaııasy Memlekettik Týdy Medeýge ornatý týraly bastama kótergen-di. Bul bastamaǵa «Nur Otan» partııasy men Almaty qalasynyń ákimdigi qoldaý kórsetti. Týdyń bıiktigi   40 metr, al kólemi – 7 de 14 metr.

Sońǵy jańalyqtar