9 Qazan, 17:13 211 0 Jańalyqtar Túrkistan International Political Weekly

«QUTTY MEKEN» QUTTY MA EKEN?

«Nur Otan»  partııasynyń Tóraǵasy N.Nazarbaevtyń tapsyrmasymen iske qosylǵan «Qutty meken» jobasy óz jumysyn jalǵastyrýda. Áleýmettik jáne ınjenerlik ınfraqurylymdy damytýǵa baǵyttalǵan «Qutty meken» halyqtyń ómir súrý sapasyn arttyrýdy maqsat etken. Bir aıta keterligi, Almaty qa­lasyndaǵy áleýmettik ınfraqurylym nysandary partııalyq ba­qy­laýǵa alynǵan. Olardyń sany shamamen 100-ge jýyq.

Jýyrda «Nur Otan» partııasy Almaty qalalyq fılıaly muryndyq bolyp, mem­lekettik organdar men máslıhat depý­tattary áleýmettik jáne ınjenerlik ınf­raqurylym nysandaryna jumys kestesinen qalys qalý sebepterin anyqtaý jáne nysandar qurylysynyń sapasyn baqylaý úshin bardy. «Nur Otan» partııasy Almaty qalalyq fılıaly tóraǵasynyń birin­shi orynbasary Stanıslav Kankýrov bastaǵan baqylaý komıssııasy Jetisý aýdanyndaǵy Mochalov kóshesindegi jol jóndeý jumystarymen, №4 perzenthana qurylysmen, sondaı-aq, «Jas qanat» yqsha­maý­danyndaǵy jeti úıdiń qurylys jumys­tarymen tanysty. Atalǵan áleýmettik mańyzy bar nysandar beımálim bir sebeptermen qurylys jumystaryn kesheýildetip otyr. Mochalov kóshesindegi jol kólik qozǵalysyna kedergi keltirip, joldy kesip ótetin mektep balalaryna qolaısyzdyq týdyrǵan. Osyǵan deıin kóshe laılanyp, jańbyrly kúnd­eri júrý qıynǵa soqqan. Jańadan sý qubyry tartylýyna baılanysty kó­she qazylǵan. Nysan 15 qazanǵa deıin aıaqtalýy tıis edi. Alaıda qurylysqa jaýapty merdigerler aıdyń aıaǵyna deıin bitiremiz dep otyr. Baqylaý komıssııasy jumysty jedeldetý sharalaryn qoldaný keregin aıtty. Kóshe turǵyndarynyń aıtýyna qaraǵanda, bul jerde ba­lalar alańy múldem bolmaǵan. Partııa ba­qylaýǵa alǵaly bul olqylyq retke keldi.

Elimizdegi demografııalyq ósim qarqyny jaǵynan Almaty alǵashqylardyń biri. Jyl ótken saıyn týý kórsetkishi artyp otyr. Máselen qaladaǵy №4 perzenthanada 95 tósek oryn bolsa, qazirgi qajettilik 120-130-ǵa jetken. Osyny eskergen basshylyq 2017 jyldyń mamyr aıynda jańa nysannyń qurylys jumystaryn bastaǵan. Per­zenthana bas dárigeri Vıacheslav Paktiń aıtýynsha, tórtqabatty ǵı­marattyń qurylys jumystary áli to­lyq aıaqtalmaı tur. Oǵan sebep ótken jyldyń sońynan bastap osy kóktemge deıin qurylysqa jan adamnyń qoly tımepti. Baqylaý komıssııasy barǵan kezde de qarqyndy jumys baıqalmady. Bas diriger Vıacheslav Pak: «Perzenthanaǵa qajetti medıınalyq jabdyqtar satyp alynǵan, qurylys nysanynyń keshigýi saldarynan olar ázirge iske qosylmaı, bári bosqa tur. Bul perzenthanada jylyna shamamen 4 500 náreste dúnıege keledi. Eger jańa perzenthana paıdalanýǵa berilse ana men bala jaǵdaıyn jasaýǵa birshama múmkindik týar edi», – deıdi. «Bul ótken jyly jeltoqsan aıyn­da paıdalanýǵa berilýge tıis nysan bolatyn. Jaýapty qurylys kom­panııasy tıisti jumysty tolyq aıaqtamaǵan. Kompanııa basshylaryn Nur Otan partııasyna shaqyryp, baqylaýǵa alamyz. Bul óte mańyzdy nysan. Jańa perzenthana iske qosylsa, analarymyzǵa óte ıgi is bo­lar edi. Belgilengen merzimnen bir jylǵa jýyq ýaqyt assa da, qurylys jumystary áli aıaqtalmaı jatyr. Baqylaýǵa alyp, múm­kindiginshe osy jyldyń sońyna deıin iske qosýǵa atsalysýǵa tyrysamyz. «Ýnıversal B» kompanııasy ókilderin búgin kóre almaı turmyz. Kompanııa tender utyp aldy, ja­saımyz dep ýáde berdi. Biraq nysan áli aıaqtalmaǵan. Tıisti qarajat bólingen. Áleýmettik nysan qurylysy ýaqytynda aıaqtalmaǵany úshin sotqa beremiz, – deıdi Almaty qalasy máslıhaty depýtaty Roza Badaeva.

Qurylysy keshiktirilip jatqan taǵy bir áleýmettik nysan «Jas qanat» yqsha­maý­danyndaǵy jeti birdeı turǵyn úı. Baqylaý komıssııasy atalǵan nysanǵa da arnaıy bardy. «Promkomplekt-B» fırmasy esh­qan­daı tártipke, normatıvterge saı jumys jasap jatqan joq deıdi komıssııa músheleri. Qarapaıym mysal retinde qurylysy bitpegen nysanǵa kelgen azamattarǵa qaýipsizdik maqsatynda arnaıy bAskıim berilý kerek, munda tipti qurylysshylardyń ózi qaýipsizdik sharalaryn saqtamaı jumys istep jatqandyǵy aıtyldy. Onan ózge ishki jáne syrtqy jumystardyń sapasyn teksergen kezde osy aıdyń 25-inde aıaqtalýy kerek turǵyn úıdiń ishki jumystaryn aıtpaǵanda áli tóbesi jabylmaǵany anyqtaldy. Komıssııa músheleri jaýyn-shashyndy kúz jetkenin eskertip, sý tıgen qabyrǵalar erteń jaramsyz bolyp qalatynyn aıtty. Biraq merdiger kompanııa qurylysty dál ýaqytynda bitirýge senimdi túrde ýáde etti. «Atalǵan nysanǵa buǵan deıin de kelgenbiz. Qurylys kompanııasyna jumystarynyń kemshilikteri aıtylǵan. Biraq sodan beri asa kóp ózgeris joq. Son­dyqtan bul nysandy aldaǵy ýaqytta da baqylaýymyzda ustaımyz. Qala tur­ǵyndaryna arnal­ǵan, respýblıkalyq bıýdjetten qarajat bólinip, soǵylyp jatqan áleýmettik turǵyn úılerdiń sapasy zaman talabyna saı bolýy kerek, – deıdi «Nur Otan» par­tııa­sy Almaty qalalyq fılıaly ja­nyndaǵy sybaılas jemqorlyqqa qarsy kúres jónindegi qoǵamdyq keńes tóraǵasy Borıs Japarov. «Nur Otan» partııasy Almaty qalalyq fılıaly aldaǵy ýaqytta da tekserý jumystarynyń jalǵasatynyn aıtty.

 

Sońǵy jańalyqtar