4 Qazan, 10:16 332 0 Ádebıet Anar LEPESOVA

Londonda Abaı muralary ulyqtaldy

Londonda qazaqtyń uly aqyny Abaıdyń 175 jyldyǵyna arnalǵan jıyn ótti. Qazaq oıshylynyń muralary ulyqtalǵan shara Eýrazııalyq mádenıet aptalyǵy aıasynda uıymdastyryldy.

«Abaı murasy tek Qazaqstan halqyna ǵana emes, búkil adamzatqa ortaq. Onyń esimi hám shyǵarmalary aǵylshyn aqyny jáne dramatýrgi Shekspırdiń eńbekterimen bir qatarda turady». Bul brıtanııalyq zııaly qaýym ókilderiniń pikiri. Kezdesý barysynda jazýshylar, aqyndar jáne ádebı aýdarmashylar uly oıshyldyń shyǵarmalarynan qandaı ǵıbrat alǵandaryn aıtty.

Bestsellerge aınalǵan ǵylymı-kópshilik kitaptardyń avtory, dramatýrg, aqyn, kompozıtor jáne ádebı aýdarmashy Djon Farndon: «Abaı qoǵamnyń alǵa jyljýy úshin kóp nárse jasady. Ózinen keıin óshpes rýhanı mura qaldyrdy. Meniń oıymsha, Abaıdyń 175 jyldyǵy qarsańynda onyń shyǵarmashylyǵy týraly Batysta kóbirek aıtyp, esimin nasıhattaı berýimiz kerek», - dep atap ótti.

Kezdesýge Eýrazııanyń kóptegen elderinen jazýshylar men aqyndar keldi. Qyrǵyzstan, Tájikstan, Reseı jáne Moldova memleketteriniń ókilderi Abaıdyń ótken ǵasyrda aıtqan oılary qazir de ózekti ekendigin ashyp aıtty.

«Aqyn shyǵarmalary ómirlik qýat beredi jáne oqyrmannyń dúnıetanymyn ózgertedi», - atap ótti qonaqtar. Qazaqstandyq ókilder óz kezeginde Abaıdyń 175 jyldyǵyna josparlanǵan mádenı is-sharalardyń aýqymy keń ekenin, buǵan elimizde júzege asyrylyp jatqan «Rýhanı jańǵyrý» baǵdarlamasynyń yqpaly zor ekenin aıtty.

«Abaıdy zerttep júrgen qazaq ádebıetiniń kórnekti ókilderinen basqa, basqa salanyń da myqty ǵalymdary bar. Men osy joly ekonomıst Orazaly Sábdenniń aqyndy ózinshe zerttep, Abaı álemi arqyly Qazaqstandy qalaı joǵary deńgeıge kóterýge bolatynyn jazǵan eńbekteri týraly bóliskim kelip otyr», - dedi basqosýda Eýrazııalyq shyǵarmashylyq gıldııasynyń múshesi, ádebı agent Baqtygúl Mahanbetova.

Sońǵy jańalyqtar