3 Qazan, 22:28 331 0 Aımaq Anar LEPESOVA

"Bizge malsyńdar deıdi": Almaty oblysynda muǵalimder kórgen qorlyqtaryn aıtyp berdi

Almaty oblysynda mektep muǵalimderi sabaq ótkizýden bas tartty. Olar dırektordyń orynbasarynan kórgen qorlyqtaryn aıtyp, shý shyǵardy. Aıtýlarynsha, dırektor orynbasary aqsha jınap, kemsitip, negizsiz aıyppul salatyn kórinedi, dep habarlaıdy KTK arnasy.

«Ol eshkimdi tyńdamaıdy. Mektepte ózi qudaı, ózi sot. Oıyna kelgenin jasap, aqsha jınaıdy. Komıssııa keletin bolsa, tizim boıynsha shaqyryp, aqsha talap etedi. Ol munda jumys istemeýi kerek dep sanaımyn», - deıdi muǵalimderdiń biri Oksana Babahanova.

Alǵa aýlyndaǵy orta mektep dırektorynyń orynbasary bul qyzmetke 10 jyl buryn kelgen. Muǵalimderdiń sózinshe, osy ýaqyt ishinde 8 dırektor aýysypty. Pedagogtar kún saıyn dırektordyń orynbasarynyń daýys kóterýi men tártipsizdikke tózýge májbúrmiz deıdi.

Al 30 jyldyq tájirıbesi bar bastaýysh synyp muǵalimi Toty Yntyqbaeva aı saıynǵy jalaqysyn da tolyq almaıtynyn aıtady.

«Ol ata-analardyń aldyna bizdi topas dep aıtady. Muǵalimderdi kabınetine shaqyryp alyp, «malsyńdar» dep sóıleıdi. Men 200 myń teńgeden asa jalaqy alýym kerek. Alaıda qolyma tek 160 myń teńge tıedi. Osylardyń bárinen keıin dırektordyń orynbasaryn qyzmetinen shettetti. Alaıda keshe dırektor onyń qyzmetine qaıtyp keletinin aıtty», - deıdi Toty Yntyqbaeva.

Al mektep dırektory óz orynbasaryny qyzmetinen bosatylyp, artynan qaıta taǵaıyndalǵanyn joqqa shyǵarmaıdy.

«Aıgúl Týarshıeva 5 qyrkúıekke deıin talap etilgen esep, sabaq kestesi, oqý-tárbıe jumystarynyń josparyn tapsyrǵan joq. Sol úshin ony qyzmetinen shettetýime týra keldi. Alaıda sol kezde ol densaýlyǵyna baılanysty eńbekke jaramsyzdyq demalysynda boldy. Sondyqtan oǵan qyzmetin qaıtarýǵa májbúr boldym», - deıdi mektep dırektory Jazıra Balahan.

Dırektor qyzmettik tekseris júrgizýge ýáde etti. Alaıda muǵalimder munyń tıimdiligine kúmánmen qaraıdy. Olar Sybaılas jemqorlyqqa qarsy is-qımyl ulttyq bıýrosyna da shaǵymdanǵandaryn, biraq nátıjesiz bolǵanyn aıtady.

Al dırektordyń orynbasary muǵalimder jala jaýyp otyr deıdi. Sózinshe, ony qatal basqarýshy bolǵany úshin unatpaıdy eken.

«Munyń bári jala. Ony bir alaıaq áıel uıymdastyryp otyr. Meni qyzmetimnen bosatý úshin múmkin emes nárseni talap etýde. Mektepten ketkenimdi qalaıdy. Bul meniń týǵan aýlym bolsa, qalaı ketemin?» - deıdi dırektordyń orynbasary Aıgúl Týarshıeva.

Aýdandyq bilim  bólimindegiler mektepte tekseris júrgizilip, dırektordyń orynbsarynyń tarapynan buzýshylyqtar anyqtalmaǵanyn málimdedi.

«Bul shaǵymdar eki tulǵanyń dırektordyń oqý isi boıynsha orynbasary Aıgúl Týarshıeva men bastaýysh synyp muǵalimi Toty Yntyqbaevanyń birbirine jazǵan shaǵymdary. Komıssııanyń sheshimi boıynsha, bul eki adamnyń arasyndaǵy birbirine degen túsinispeýshilik. Bul jaǵdaı mekteptiń oqý tárbıe úrdisine jáne pedagogıkalyq ahýaldyń ýshyǵýyna ákep soǵýy múmkin. Onyń aqıqatyna biz jete almadyq», - deıdi Eńbekshiqazaq aýdany bilim bóliminiń basshysy Bátes Amanova.

Sonymen qatar aýdandyq bilim bólimindegiler bul daýǵa aralasqysy kelmeıtinderin jetkizip, mektepte qosymsha tekseris júrgizilmeıtinin aıtty. Al muǵalimderge sotqa júginýdi usyndy. Alaıda muǵalimder bilim mınıstrligine shaǵymdanamyz dep otyr.

Sońǵy jańalyqtar