3 Qazan, 16:39 320 0 Ádebıet Dınara MYŃJASARQYZY

      Sultanbek Qojanovtyń týǵanyna – 125 jyl

    Qyrkúıektiń 10 kúni belgili memleket jáne qoǵam qaıratkeri Sultanbek Qojanovtyń týǵanyna 125 jyl toldy. Stalındik repressııanyń qurbany bolǵan bir týar azamatty eske alyp, ultjandylyǵy memleketshildikpen ulasqan, ór tulǵasy saıasat úshin de, tarıh úshin de qyzmet jasaıtyn marqumnyń týǵan kúnin atap ótý jıyndary elimizdiń barlyq óńirlerinde ótkizilýde.

Qara basynyń qamyn oılamaı, tek óz halqynyń qamyn jep, eńirep ótken ardaqty aǵamyz Sultanbek Qojanovty eske alyp, týǵan kúnin atap ótý jıyny qyrkúıektiń 10 kúni Qyzylorda qalasynda S. Ysqaqov atyndaǵy qurylys jáne bıznes kolledjiniń 2005 jyldan beri kórkin ashyp turǵan Sultanbek Qojanovtyń eskertkishiniń aldynda ótkizildi. Sultanbek Qojanov jóninde, onyń ómir joly men qyzmeti jaıly QR Jýrnalıster, Halyqaralyq Jazýshylar Odaqtarynyń múshesi, Qojanovtanýshy Seksenáli Rahanov óz baıandamasynda  jan‑jaqty, naqty derekter keltire otyryp baıandap berdi. Jıynǵa kelgen qonaqtar jáne kolledj pedagogıkalyq ujymy men stýdent jastar Sultanbek Qojanovtyń kim ekeni, qazaq halqynyń egemendi el bolýy úshin qandaı eńbek sińirgeni jaıly tolyq málimet aldy.

Men de sol jıynǵa qatysyp, baıandamada keltirilgen mol málimetterdi qaıtalap jatpaı, Sultanbek Qojanovtyń Syr eli úshin, Qyzylorda qalasy úshin naqty sińirgen eńbegi jaıly áńgimelep berdim.

Sultanbek Qojanov Ońtústik Qazaqstannyń, onyń ishinde Syr óńiri «Teriskeı» dep atap ketken Sozaq jeriniń, Aqsúmbe aýylynyń týmasy. Degenmen, jalpy qazaq balasyn turǵan jerine qarap alalap kórmegen, bar qazaqty óziniń baýyry sanaǵan Sultanbek Qojanovtyń Qyzylordada da taıǵa tańba basqandaı izi qalǵan. Atap aıtar bolsaq: Qazaq eliniń alǵashqy astanasy búginde Reseıdiń terrıtorııasynda qalyp ketken Orynbor qalasy bolǵan. Keńes úkimeti óziniń qaıratyn boıyna jınap, kúsh‑qýaty kemeline kelmeı turǵan kezinde astanany Qazaqstannyń ortalyq aımaǵyna kóshirýdi oılap, sol kezdegi qazaq eliniń basshylaryn úgittep, Ortalyq Komıtetti kóndirip, 1925 jyly Qyzylorda qalasyn astanaǵa aınaldyrýdaǵy Sultanbek Qojanovtyń eńbegi ushan‑teńiz. Sol kezeńde qalanyń atyn Qyzylorda dep ataýǵa usynys jasaǵan da Sultanbek degen derek bar. Eger Sultanbek Qojanov aǵamyzdyń osy kóregendigi bolmaǵanda Qazaq eli de tatar, bashqurt aǵaıyndar sııaqty Reseı federaııasynyń quramynda qalyp keter edi.

1918‑1924 jyldary ashtyqqa qarsy kúres komıssııasy tóraǵasynyń orynbasary retinde Sultanbek Qojanov búkil Qazaqstan men Orta Azııa elderinde ashtyqtan adam shyǵynyn boldyrmaý úshin, tamaqtandyrý oryndaryn ashyp, eldi toıyndyrǵany belgili. Jańaqorǵan aýdanynyń  Súttiqudyq /burynǵy «Krasnaıa Zvezda»/ keńsharynyń turǵyny Mámbetov Qypshaqbaı degen Uly Otan soǵysynyń múgedegi, úlken aqsaqal boldy. Sol kisiniń óz aýzynan «Sultanbektiń shúlen kójesin iship Syr óńiriniń halqy ashtyqtan aman qaldy» degen áńgime estip edim. Ol kezde jas kezim, Qypshekeńnen: «shúlen kóje degen ne, Sultanbek degen kim?» dep suradym. Ol kisi Sultanbektiń ákesi Qojanmen týys eken, Sultanbektiń ómir joly men qyzmeti jaıly kóp málimet berdi, al «shúlen» degenniń ne ekenin jasy úlken kisiler bolmasa, bilmeıtinder kóp ekenin aıtty. Qypshekeńniń aıtýynsha «Shúlen taratý» degen, kez kelgen nárseni tegin taratyp berý eken. Ashtyqpen kúresý úshin Sultanbek Qojanov Tashkentten shyǵatyn poıyzǵa ishinde kóje pisiretin qazandar ornatylǵan arnaıy vagon tirketip, árbir bekette toqtatyp halyqqa kóje úlestirtedi eken, ol poıyz Reseı shekarasynan ótip ketkenshe «shúlen kóje» taratý toqtamaıdy eken. Bul áreketten Sultanbek Qojanov aǵanyń iskerligimen birge, asqan tapqyrlyǵyn da baıqaýǵa bolady. Qarapaıym halyqtyń esinde umytylmaı qalyp, bizge deıin jetken mundaı qamqorlyq Sultanbek Qojanovtyń ǵana qolynan kelgen.

Ońtústik Qazaqstan oblysynda egindi sýlandyratyn sýdyń bolmaýynan padalanylmaı qańyrap jatqan kólemdi jerdi jergilikti halyq orystarǵa eliktep «Golodnaıa step» dep atap ketken eken. Jabaıy ańdardan basqa jan balasy júrýge de qorqatyn osy jerdi tıimdi paıdalaný úshin Sultanbek Qojanov jergilikti halyqty uıymdastyryp, qol kúshimen ataqty «Qońyrat» kanalyn qazdyrady. Sonyń nátıjesinde orasan mol jer ıgerilip, «Golodnaıa step» aty joıylyp «Myrzashól» degen tamasha atty ıelendi. Kanaldyń arqasynda elimizde maqta egistiginiń kólemin arttyrýǵa qol jetkizildi. Meniń ákem Esirkepov Rahym sol kezeńde aldymen Ońtústik Qazaqstan oblysynyń Kırov aýdanynda aýdandaǵy bar tehnıka shoǵyrlanǵan MTS‑tiń dırektory, keıinnen «Bostandyq aýdanynda hatshy bolyp qyzmet atqarǵan bolatyn. Ákem Myrzashóldi ıgerý úshin qazylǵan «Qońyrat» kanalynyń jumysyna basynan aıaǵyna deıin qatysyp, Sultanbek Qojanovpen kezdesip, birneshe ret subhattas bolǵan eken. Ol kisiniń qarapaıymdylyǵyn, aıryqsha iskerligin, aıtqanyn oryndatpaı qoımaıtyn tabandylyǵyn, ótkirligin meniń ákem súısine otyryp, rızalyq sezimmen únemi aıtyp otyratyn. Ekeýiniń jastary da qatar eken, áńgimeleri jarasqan sııaqty.

Sultanbek Qojanov qandaı jaýapty qyzmette júrse de aldymen qazaq jastarynyń bilim alýyna erekshe nazar aýdaryp, elimizge bilimdi, joǵary saýatty azamattardyń asa qajet bolatynyn esinen shyǵarmaǵan kisi. Júrgen jeriniń bárinde talapty, talantty jastardy izdestire júrip, olardyń bilim alýyna tikeleı kómek beripti. Asa talanttylaryn Orynbor, Qazan, Troık, Máskeý, Lenıngrad jáne t. b. qalalardaǵy oqý oryndarynda oqýyna múmkindik jasap, joldama alyp berip otyrǵan. Jańaqorǵan aýdanynyń «Birlik» aýylynda Qarataı Isaev degen aqsaqal boldy. Sol kisi meniń ákem Ońtústik Qazaqstan oblysynyń Kırov aýdanynda MTS dırektory bolyp turǵan kezinde  bilim alýdy oılap, aqyldasý úshin izdep barypty. Bilimge qushtar jastarǵa kómektesetinin biletin ákem Qarataıdy Sultanbek Qojanov aǵasyna jolyqtyryp, kelgen jumysynyń mánisin aıtady. Bilim alýdy kózdep kelgen jastyń talabyna rıza bolǵan Sultanbek Qojanov sózge kelmesten Qarataıdyń qolyna joldama jazyp berip, Qyzylordaǵa attandyrady. Sonyń arqasynda Qarataı aǵamyz Qyzylorda qalasyndaǵy muǵalimder daıarlaıtyn qysqartylǵan kýrsty bitiripti. Kýrsty bitirgennen keıin aýylǵa kelip, halyqty jappaı saýattandyrý úshin ashylǵan «Lıkbezge» muǵalim bolǵan eken.

Sultanbek Qojanov aǵamyz shoqtyǵy bıik saıası tulǵa, qoǵam qaıratkeri bolýymen birge, halyq aǵartý komıssary da /búgingi túsinikpen aıtsaq, bilim mınıstri/ bolyp, qazaq jastarynyń joǵary bilim alýyna aıryqsha kóńil bólip, El bolashaǵy‑Jastar bolǵandyqtan olardyń bilimdi bolýy qajetti ekendigin jete túsingen aǵartýshy.

Jastarǵa jan‑jaqty bilim berý máselesiniń mańyzdylyǵy men ózektiligi búgingi kúni de óz maǵynasyn joıǵan joq. Táýelsiz memleketimizdiń jarqyn bolashaǵy bolyp tabylatyn sanaly urpaqty oqytyp, tárbıeleý arqyly ǵana elimiz básekege qabiletti memleket bola alady. Olaı bolsa Sultanbek Qojanovtyń týǵan kúninde jyl saıyn kolledj stýdentteri men ustazdardyń jáne qala turǵyndarynyń uly tulǵanyń rýhyna taǵzym etýi, eskertkishine gúl shoqtaryn qoıýy quptarlyq is, onyń esimi umyt qalmaýy tıis.

Sondyqtan kolledj stýdentteri, Sender Egemendi Qazaqstannyń erkin ósken tólderisińder! Elimizdiń bolashaǵyna aldaǵy ýaqytta jaýapty azamat‑ Sendersińder! Sondyqtan senderge ustazdaryń qoıyp otyrǵan talapty óz dárejesinde oryndap, el senimin aqtaýǵa tıissińder. Ol úshin sender jaqsy oqyp, ózderiń qalaǵan kásipti meńgerip úlken ómirdegi óz oryndaryńdy tabatyndaryńa bizdiń de kolledj basshylyǵy men ınjener‑pedagogtardyń da senimi mol. Kolledjdiń ınjener‑pedagogtary Sizderdi jáne kolledj stýdentterin uly tulǵa, qoǵam qaıratkeri Sultanbek Qojanovtyń rýhy qoldaı bersin! Qalaı bolǵanda da Sultanbek Qojanov aǵanyń eskertkishine Sizdiń kolledjdiń aldynan oryn buıyrýy da tegin emes. Muny da esten shyǵarmaýǵa tıissizder!

Sultanbektiń armany

Elim!‑dep soqqan júregi,                                                                                         Sultanbek asqan er edi.                                                                                          Aqyly asqan danyshpan,                                                                                                                                                                                                             Armandap ótti Arystan:                                                                                                                 San ǵasyr attan túspegen,                                                                                     Qarystaı jerin bermegen.

Táýelsizdik úshin kúresken,                                                                                   Berispeı jaýmen tiresken.                                                                                      Jan berip‑jan alysqan,                                                                                          Sheginbeı keıin shabysqan.                                                                                                                                                                                                                                                                                                                                                          Jaýdyń basyn almasań,                                                                                          Saǵan sert dep, aldaspan!                                                                                  Keń‑baıtaq jerin qorǵaǵan,                                                                                  «Amanat» dep babańnan!                                                                                            Aırylmaı endi tutyn dep,                                                                                      Máńgilik bizge qaldyrǵan.                                                                                                                                                                                                               Táýeldi bolmaı eshkimge,                                                                                      Baqytty bolǵaı urpaǵym.                                                                                        Dep ótti babalar ómirden,                                                                                     Meniń de osy Armanym!                                                                                           Degen eken er Sultekeń!                                                                                                                                                                                                                                                                                                                                           Ún qosaıyq qane bárimiz,                                                                                          Jetse eken aǵaǵa únimiz.                                                                                                                                                                                                                            Oryndaldy aǵa armanyń,                                                                                    Jarqyraı shyqty kúnimiz!                                                                                          Táýelsizdiktiń tańy atty,                                                                                       Jat jurt ta bildi qazaqty.                                                                                         Egemendi elmiz qazir biz,                                                                                        Sulteke! halqyń baqytty!

 Ahmet Rahymuly Esirkepov, ardager ustaz.                                                                

Sońǵy jańalyqtar