22 Qyrkúıek, 02:09 563 0 Sport Dınara MYŃJASARQYZY

Bekzat Nurdáýletov – álem chempıony

Reseıdiń Ekaterınbýrg qalasynda ótip jatqan bokstan Álem chempıonatynda 81 keli salmaqta qazaqstandyq boksshy jeńimpaz boldy. Qazaqstandyq Bekzat Nurdáýletov fınalda ózbekstandyq boksshy Dılshodbek Rýzmetovpen judyryqtasyp, tóreshiler sheshimimen 5:0 esebin jeńiske jetti.

Osylaısha, Qazaqstan qorjynyna alǵashqy altyn medaldy saldy. Bekzat jekpe-jek bastalǵan sátten bastap, óziniń qarsylasynan bir bás joǵary ekenin kórsete bildi. Esterińizge sala keteıik, Nurdáýletov jartylaı fınalda 81 kelige deıingi salmaq dárejesinde tórt dúrkin álem chempıony jáne Rıo-2016 Olımpıada chempıony kýbalyq Hýlıo Sesar la Krýstan basym tústi. Tipti, jartylaı fınaldyń ekinshi raýndynda Nurdáýletov qarsylasyn nokdaýnǵa jibergen bolatyn. Mine, otandasymyz osyndaı myqty qarsylastarynyń barlyǵyn joldan taıdyryp, álem chempıony atandy.

QR Mádenıet jáne sport mınıstri Aqtoty Raıymqulova álem chempıonatynda Qazaqstan qorjynyna altyn medal salǵan Bekzat Nurdáýletovti quttyqtady.

"Qurmetti Bekzat!
Barlyq jankúıerlerińniń jáne jeke óz atymnan jeńisińmen quttyqtaımyn! Tórtkúl dúnıe kóz tikken básekede qarsylastaryńnan bir bás joǵary ekenińdi aıqyn dáleldediń. Seniń altyn medalǵa jetý jolynda 6 birdeı boksshyny joldan taıdyryp, myqtylyǵyńdy tanytqan bul jeńisiń qazaq eliniń álemdik sporttaǵy ornyn aıǵaqtaı tústi.
Denińe saýlyq, aldaǵy Tokıo olımpıadasynda da elimizdiń kók baıraǵyn jelbireter jarqyn jeńister tileımin", – delingen quttyqtaýda.

Sońǵy jańalyqtar