20 Qyrkúıek, 10:02 459 0 Rýhanııat Anar LEPESOVA

Qaraǵandyda ótken halyqaralyq aıtystyń jeńimpazdary anyqtaldy

Qaraǵandy qalasynda «Nur Otan» partııasynyń qoldaýymen jáne oblys ákimdiginiń uıymdastyrýymen ótken halyqaralyq aqyndar aıtysy óz máresine jetti.

Eki kún boıy aıtyssúıer qaýymnyń delebesin qozdyrǵan jyr dodasynda arqaly aqyndardyń qazaqtyń saf ónerin óz bıiginde kórsete bildi. Qaraǵandy jurtshylyǵynyń aıtysqa shólirkep qalǵany qalyń kórermennen baıqalady. Syımaǵan jurtshylyq kishi zalǵa qoıylǵan ekrannan aıtysty tamashalady. Jyr dodasyna tórt eldiń aqyndary kelgen. Alǵashqy kúni QHR, Qyrǵyzstannan, Mońǵolııadan jáne elimizdiń ár óńirinen kelgen 18 aqyn synǵa túsip, sodan úzdik dep tańdalǵan 7 jup kelesi kezeńge ótti.

Fınaldyq básekede aıtys tipten qyza tústi. Aqyndar qoǵamdaǵy túıtkilderdi búkpesiz aıtyp, halyqtyń kókeıindegi máseleni dóp basyp jetkizýge tyrysty. «Nur Otan» partııasy qazaqtyń ulttyq óner aıtystyń óristeýine, aqyndardyń shyǵarmashylyq deńgeıiniń ósýine basa kóńil bólýde. Bıyldyń ózinde el kóleminde 5 úlken aıtysty ótkizýge muryndyq bolyp otyr.

Aıtysty tamashalaýǵa arnaıy kelgen «Nur Otan» partııasy Tóraǵasynyń Birinshi orynbasary Baýyrjan Baıbek eldiń múddesin jyrǵa qosqan aqyndardyń tapqyrlyǵyna rızashylyǵyn bildirdi. Óz sózinde Baýyrjan Baıbek qoǵamdyq oı men mádenı tarıhymyzda erekshe orny bar kúresker tulǵaǵa arnap ótkizilgen bul aıtys «tar jol, taıǵaq keshý» zamanda ómir súrgen aıaýly aqynnyń rýhyn asqaqtatyp qana qoımaı, birligimiz ben yntymaǵymyzdy da nyǵaıta túskenin aıtty.

Sondaı-aq ol aıtystyń ulttyq muramyz ǵana emes, qoǵamdaǵy ózekti máselelerdi ashyq aıtyp, olardyń aldyn alý joldaryn usynatyn utymdy tetik ekenin de tilge tıek etti.

– Qazaqta «aýrýyn jasyrǵan óledi» degen sóz bar. Sonldyqtan biz kemshilikterimizdi ashyq aıtyp, olardy sheshý joldaryn qarastyrýymyz kerek. Bul rette aıtystyń róli erekshe. Aıtys – bizdiń rýhanı baılyǵymyz. Sol sebepti partııa tól ónerimizdi qolǵa alyp, júıeli túrde qoldaý kórsetetin bolady, – dedi Baýyrjan Baıbek.

Sonymen partııa Tóraǵasynyń Birinshi orynbasary partııanyń saıası doktrınasynda rýhanııat, mádenıet, ulttyq qundylyq máselesine úlken kóńil bólingenin jetkizdi.

– Tól mádenıetimizdi tórge shyǵarmasaq jetistikterge jete almaımyz. Sondyqtan bizdiń partııa aıtysty qolǵa alyp otyr. Tek bıylǵy jyldyń sońyna deıin «Nur Otan»-nyń qoldaýymen bes alaman aıtys ótedi. Onyń alǵashqysy Atyraýda ótken Farıza Ońǵarsynovanyń 80 jyldyǵyna arnalǵan aıtys bolsa, ekinshisi Saryarqa tórindegi búgingi sóz saıysy. Odan bólek, qyrkúıektiń sońynda Almaty qalasynda «Otan otbasynan bastalady» atty otbasylyq aıtys ótedi. Al qazan aıynda Nur-Sultan qalasynda jáne jyl sońynda Oral qalasynda «Altyn dombyra» respýblıkalyq aqyndar aıtysy uıymdastyrylady, – dedi Baýyrjan Baıbek.

Asanáli Áshimov bastaǵan qazylar alqasynyń sheshimimen qaraǵandylyq Maqsat Ahanov pen astanalyq Jandarbek Bulǵaqov bas júldeni (2 mln teńgeden) jeńip aldy. Batysqazaqstandyq Baýyrjan Shırmedınuly men astanalyq Ómirjan Kópbosynov birinshi orynǵa (1 mln teńgeden) ıe boldy.

 

 

Sońǵy jańalyqtar