19 Qyrkúıek, 12:17 412 0 Nur Otan Anar LEPESOVA

Múgedektik kedergi emes

«Nur Otan» partııasy oblystyq fılıalynyń uıymdastyrýymen partııanyń «Kedergisiz keleshek» jobasy aıasynda múmkindigi shekteýli jandarǵa arnalǵan bos jumys oryndary jármeńkesi ótti.

Partııa doktrınasyna sáıkes joǵary ómir súrý standarty boıynsha barlyq azamatqa áleýmettik qyzmetter teń qoljetimdi bolý qajet. Bul memlekettiń, azamattardyń jáne jumys berýshilerdiń tileýles jaýapkershiligi arqyly qamtamasyz etilýi tıis. Osy maqsatta Úkimet múgedekterdiń quqyǵyn qamtamasyz etý jáne ómir súrý sapasyn arttyrý boıynsha is-sharalar josparyn qabyldap, kezeń-kezeńmen júzege asyrýda. Nátıjesinde Qazaqstanda halyqtyń eńbekke jaramsyz bolyp qalý táýekelderin aldyn alýǵa, ómirdiń qıynshylyǵyna tap bolǵandar men múgedektiktiń bastalý kezi men múgedektikti ońaltýǵa – arnaıy áleýmettik kómek kórsetýge baǵyttalǵan birqatar zań qabyldandy.

Partııanyń «Kedergisiz keleshek» jobasyn iske asyrý Elbasy – «Nur Otan» partııasynyń Tóraǵasy N.Nazarbaevtyń tapsyrmalarynyń tıimdiligin arttyrady jáne múmkindigi shekteýli jandardyń ómir súrý sapasyn arttyrýda memlekettik ýákiletti organdar men úkimettik emes uıymdardyń kúshterin biriktirýge múmkindik beredi.

Sharany partııanyń oblystyq fılıaly tóraǵasynyń orynbasary Shábden Tileýmurat ashyp, jármeńke jumysyna sáttilik tiledi. Ol óz sózinde sońǵy úsh jylda partııanyń Jambyl oblystyq jáne aýmaqtyq fılıaldarynyń qoǵamdyq qabyldaý bólmelerine 187 múmkindigi shekteýli jan ótinishpen kelip, onyń 66-sy oń sheshimin tapqanyn jetkizdi.

– Túsken ótinishterdiń basym bóligi múmkindigi shekteýli jandardy jumysqa ornalastyrý, materıaldyq kómek berý, turǵyn-úı máseleleri bolǵan. Osy máselelerdi eskere kele, partııa oblystyq jáne aýmaqtyq fılıaldary «Kedergisiz keleshek» partııalyq jobasyn júzege asyrý maqsatynda jyl saıyn múmkindigi shekteýli jandarǵa arnalǵan bos jumys oryndarynyń jármeńkesin uıymdastyrady. Bıyl bul jármeńke ekinshi ret ótkizilýde. Sońǵy úsh jylda múmkindigi shekteýli jandarǵa arnalǵan bos jumys oryndary jármeńkesiniń qorytyndysy boıynsha 400-ge jýyq múgedek jan jumysqa ornalasqan, – dep atap ótti Shábden Tileýmurat.

Bos jumys oryndary jármeńkesinde 24 jumys berýshi mekemeden 70 mamandyq boıynsha 166 jumys orny usynyldy.

 

Sońǵy jańalyqtar