19 Qyrkúıek, 12:12 376 0 Nur Otan Anar LEPESOVA

Áleýeti zor áriptestik

Apta basynda «Nur Otan» partııasy Tóraǵasynyń Birinshi orynbasary Baýyrjan Baıbek Vetnam kommýnıstik partııasynyń Ortalyq komıtet hatshysy Vo Van Thyongpen kezdesti. Kezdesý barysynda taraptar ekijaqty yntymaqtastyq pen mádenı-gýmanıtarlyq baılanysty damytý perspektıvalaryn talqylady.

Qazirgi tańda eki el arasynda dástúrli dostyq qatynas ornaǵan. Vetnam – Qazaqstan úshin Ońtústik-Shyǵys Azııadaǵy ekonomıkalyq jáne saıası salmaqty seriktes. Sońǵy jyldary ekijaqty taýar aınalymy turaqty túrde alǵa ilgerilep keledi. Bul kórsetkish sońǵy 5 aı merzimniń ózinde 23 paıyzǵa ósken. Eki memlekettiń ekonomıkasyn damytýǵa yqpal etip, bolashaqta úlken úmit kúttiretin baǵyt qyzmet kórsetý jáne týrızm salasy bolyp otyr.

– Qazaqstan – Ortalyq Azııadaǵy eń qarqyndy damyp jatqan, halyqaralyq qaýymdastyqtyń qurmetine ıe bolyp otyrǵan memleket. Biz tek ekonomıkalyq yntymaqtastyqty ǵana emes, sonymen qatar mádenıet, bilim jáne basqa da salalarda ózara baılanysty damytýdy kózdeımiz, – dedi Vo Van Thyong.

Kezdesýden keıin «Nur Otan» partııasynyń Ortalyq apparatynda Nur Media holdınginiń tilshilerine bergen suhbatynda Vo Van Thyong Qazaqstan men Vetnam arasyndaǵy seriktestiktiń áleýetti baǵyttary týraly oıyn aıtty.

«Ekonomıkalyq yntymaqtastyq baǵyttarynyń áleýeti óte zor. Vetnam – aımaqtyń agroónerkásiptik salasyn damytýdaǵy kóshbasshy memleketterdiń biri. Biz aýylsharýashylyq ónimderin, mysaly, kúrish, teńiz ónimderin eksporttaýda úlken tájirıbe jınadyq. Eń qıyn degen naryqtardy sátti ıgerdik. Qazirgi kezde AQSh, Batys Eýropa, Japonııa elderimen tyǵyz qarym-qatynastamyz. Qazaqstandy ónimderimizdi alǵa jyljytýdyń perspektıvaly baǵyty dep sanaımyz jáne sizderdiń ónimderińiz bizdiń elde de úlken suranysqa ıe bolatynyna senimdimin», – dedi mártebeli meıman.

Sońǵy jańalyqtar