18 Qyrkúıek, 10:34 471 0 Jańalyqtar Anar LEPESOVA

Avtobýs júrgizýshisiniń anasy: "Ulymnyń jany kópirdiń jolynda qurban"

Shamalǵan stanııasyndaǵy kópir máselesi eki kúnnen beri búkil aqparat quraldarynda aıtylyp, áleýmettik jelide qyzý talqylanǵan soń bolar, keshe óńirge bir top sheneýnik keldi. Áıtpese, turǵyndardyń «kópir kerek» dep aıtyp kele jatqanyna on jyldan asqan. Shymady taýsylǵan shamalǵandyqtar bul joly aıqaıǵa basyp, ýádeniń tez arada oryndalýyn qatty talap etti, dep habarlaıdy Evrazııa arnasy.

Jıyrma jyldan beri birde bir ákimmen kezdesý ótkize almaǵan jurt sózderin tańqalyspen bastady. Óıtkeni, ásheıinde shamshyraqpen izdese tappaıtyn sheneýnikter taıly-tuıaǵy qalmaı túgel kelgen jıynǵa. Shamalǵan aýylynyń turǵyndaryna qaraǵanda shendi-shekpendi kóp. Ashýly halyq eń áýeli osyǵan deıin salynbaǵan kópirdiń jyryn aıtty. Bárine eki kúnde bir aýysatyn ákimder kináli deıdi.

“Men myna jaýlyqty aýystyrǵandaı aýystyrady ákimdi. Nege qoımaıdy bes jylǵa? Bes jyl otyrǵyzsyn. Sosyn talap etsin. Sizdi solaı otyrǵyzsyn. Bizdiń tilegimiz sol”, - deıdi turǵyndar.

Kúnine júz shaqty poıyz, on myńnan astam kólik ótetin ótkel talaı adamnyń ómirin qyrshynnan qıǵan. Ne joly túzý emes, ne shlagbaýmy durys istemeıdi. Baǵdarsham atymen joq. Trotýar arman. Sheneýnikterdiń osyǵan deıin bıýdjetke aýyr salmaq degen syltaýynan ábden qajyǵan jurt, kópirdiń qurylysyn tezdetýin talap etti. Tipti, taǵy bir adamnyń ólimin kútip júrsizder me dep suraqty tótesinen qoıdy.

“Kópirdiń aqshasy tóleýli, shemasy salýly ǵoı. Sony bir jylǵa qaldyrmaı, tezdetýge bolmaı ma? Ilı taǵy bireýdiń ólgenin kútip otyramyz ba?”, - deıdi olar.

Eki júzden astam turǵyn kún astynda Almaty oblysynyń ákimi Amandyq Batalovty tapjylmaı kútti. Jergilikti sheneýnikterdiń sózin pysqyrmady da. Biraq oblys basshysy nókerlerinen tek sálemdeme joldap, eldi jubatty. Osyǵan deıin bólinbegen qarajattyń máselesi eki kúnde sheshilip, bárin qatyramyz dedi birinen soń biri sóılegen sheneýnikter.

“Júrginshiler jolaǵyn da jasaımyz. Kópir de jasaımyz. Almaty oblysynyń ákimi Amandyq Batalov sálem aıtty. Sondyqtan men sol kisiniń atynan kelip otyrmyn. Kópirdiń jobasy bolý kerek. ekspertızadan ótý kerek. Qazir birinshi qarajat jobaǵa bólinedi. Odan keıin ekspertızaǵa bólinse sonyń ózi 2-3 aıda bitirsek, ol úlken jumys”, - dedi Almaty oblysy ákiminiń orynbasary Baǵdat Mánizarov.

Al, tórt balasy eńirep, áıeli jesir qalǵan júrgizýshiniń sheshesi ulynyń erlikpen ólgenine senedi. 67 jolaýshy túgel syrtqa shyqpaı, ózi avtobýstyń oryndyǵynda qozǵalmaǵan balasynyń áreketin, kemesin tastamaǵan kapıtanǵa teńedi. Tek endi, qara jerge keshe kómilgen perzentin eshkim kinálamasa deıdi.

«Meniń ulymnyń jany kópirge qurban, qaıta eshkim ólmese sol jolda» dep jylaıdy ana júregi.

«Meniń balamdy eshkim kinálamasynshy. Ol óziniń jumysyn atqardy. Ózin berdi ǵoı sol adamdar úshin. Qurban boldy», – deıdi marqum bolǵan júrgizýshiniń anasy Sımızar Sarakova.

Al, eki balasymen birdeı reanımaııada jatqan kelinshektiń jaǵdaıy áli ońalmady. Dárigerler es-tússiz jatqan kishkentaı búldirshinderdiń háli áli de aýyr ekenin aıtady.

Sońǵy jańalyqtar