17 Qyrkúıek, 16:47 461 0 Óner Dınara MYŃJASARQYZY

Bıbigúl Tólegenova vokalısteriniń baıqaýy bastaldy

Qazaqtyń bulbul ánshisi  Bıbigúl Tólegenova vokalısteriniń halyqaralyq H baıqaýy bastaldy. Bul shara táýelsiz Qazaqstan jas ánshileriniń bıik talǵamyn, ónerge degen tereń túsinigin qalyptastyrýdy maqsat etedi. Án saıysy jańa talanttardyń esimin anyqtap, qazaq klassıkalyq ónerin asqaqtady ári jastardyń rýhanı kemeldenýine kómektesedi.

Bul baıqaýda álemniń túkpir-túkpirinen, atap aıtqanda Reseı, Qytaı, Ýkraına, Bolgarııa, Tájikstan, Ázerbaıjan, Mońǵolııa, t.b. elderden jáne elimizdiń barlyq aımaǵynan opera salasynyń 50 shaqty ónerpazy bas qosady. Dástúrli túrde uıymdastyrylatyn Bıbigúl Tólegenova vokalısteriniń halyqaralyq baıqaýy tek qana óner saıysy emes, bul Almaty qalasy men qonaqtary asyǵa kútetin án merekesine aınalǵaly qashan.

Baıqaýdyń ashylý saltanatynda Mádenıet jáne sport vıe-mınıstri Nurqısa Dáýeshov mınıstr Aqtoty  Raıymqulovanyń quttyqtaý sózin oqyp berdi. «Bul merekeniń bizdiń memlekette ótetini úlken qýanysh. Mádenıet ulttyń bet-beınesi, rýhanı bolmysy jáne aqyl-oı parasaty.  Qazaq ultynyń asyl qazynasy men mádenı murasyn tanytýǵka bar sanaly ǵumyryn arnaǵan Bıbigúl Tólegenovanyń eńbegi zor. Jas ánshilerdiń shyǵarmashylyǵyn shyńdaý maqsatynda ótkizilip jatqan konkýrs Talǵat Musabaev, Natalıa Music, Azamat Jyltyrkózov, Súndet Baıǵojın sııaqty Qazaqstannyń daryndy jastardyń ónerin ashty. Bul kúnde olar búkil álemniń sahnalarynda Qazaqstannyń vokaldyq ónerin halyqaralyq deńgeıde kórsetip júr» delingen onda.

Al osy baıqaýdyń basty sebepshisi Bıbigúl Tólegenova: «Bul baıqaýdyń ótýi – elimiz úshin abyroı. Maqsat - jas býyndy rýhanı turǵydan damytyp, ár halyqtyń klassıkalyq ónerin pash etý. Mereıtoılyq baıqaýǵa 50-den astam úmitker keldi. Negizinen qatysýshylar 17-22 jas aralyǵyndaǵy jastar. Olardyń ónerge degen jolyn ashyp, baǵyn jaǵamyz» dep, qatysýshylarǵa sáttilik tiledi.

16-26 qyrkúıek arasynda ótetin baıqaý irikteý jáne aqtyq kezeńnen turady. Barlyq tyńdalym el aldynda ótedi. Ánshilerdiń sahnaǵa shyǵý reti jerebe arqyly anyqtalady. Al sońǵy aqtyq kezeńde 14 qatysýshy baq synap, saıysqa túsedi. Ár qatysýshy óziniń óneri jaıynda shyǵarmashylyq ókilderiniń pikirin bile alady. Bul óner merekesi álemdik sahnaǵa tabany tıetin jańa esimderdiń atyn tanytady.

Halyqaralyq baıqaý qatysýshylarynyń óneri men talantyn bedeldi ári kásibı bilikti mamandardan quralǵan ádilqazylar baǵalaıdy. Olardyń qatarynda óner salasynyń maıtalmandary: Petr Sheremetev, Mıhaıl Mýntıan, Tamara Novıchenko, Damır Basyrovtar bar. Al tóraǵasy - qazaqtyń bulbul ánshisi Bıbigúl Tólegenova.

Baıqaýdy Mádenıet jáne sport mınıstrligi "Mıras" ulttyq qoǵamdyq qorymen birlesip uıymdastyrýda. Bas seriktes - "Samuryq-Qazyna" AQ.

Sońǵy jańalyqtar