12 Qyrkúıek, 18:24 419 0 Jańalyqtar Túrkistan Gazeti

Mamyrdan bastap elordadan Ekibastuzǵa 203 otbasy kóshken

«Nurly Ertis» pılottyq jobasyn iske asyrý aıasynda Pavlodar oblysyna erikti túrde qonys aýdarý boıynsha 2019 jyldyń mamyrynan beri el astanasynan Ekibastuzǵa 203 otbasy nemese 1 myń 169 adam kóshti. Bul týraly Eńbek jáne halyqty áleýmettik qoldaý mınıstrliginiń baspasóz qyzmeti habarlady. 

Jumys kúshi artyq óńirlerdiń tizimin bıylǵy mamyr aıynda Nur-Sultan qalasy tolyqtyrdy. Kenshiler qalasyna kóshýdi sheshken elorda turǵyndary úshin Ekibastuzda ómir súrýge barlyq  jaǵdaı jasalǵan. Qonys aýdarýshylardy turǵyn úımen, jumyspen qamtamasyz etedi, al qajet bolǵan jaǵdaıda oqýǵa jiberedi.

Ekibastuzǵa alǵashqylardyń biri bolyp kópbalaly Shapaǵat pen Saltanat Malıkovtar kóship keldi.

«Osy jyldyń mamyr aıynda «Nurly Ertis» jobasynyń qatysýshylary retinde biz elordadan Ekibastuzǵa kóship kettik. Kelgennen keıin bizge jaldamaly turǵyn úı - 3 bólmeli páter berildi. Joldasymdy «Optıma Trans» JShS-de avtomehanıkretinde jumysqa ornalastyrdy. Bizdiń tórt balamyz bar. Eki kishkentaıymyz egizder, 2 jasta. Úlkenderimiz ekinshi jáne altynshy synyptarda oqıdy. Balabaqsha, mektepte tamaqtaný jáne balalarǵa arnalǵan qoǵamdyq kólikter - barlyǵy tegin! Otbasymyzdyń ómiri jaqsardy dep senimmen aıta alamyn», – dep Saltanat Malıkova óz qýanyshymen bólisti.

Elordadan Ekibastuzǵa kóshken 203 otbasynyń 122-si - 3 bólmeli páterge, 69 otbasy - 2 bólmeli páterge jáne 12 otbasy - 1 bólmeli páterge jaıǵasty.

«Nurly-Ertis» jobasy nátıjeli jumyspen qamtýdy jáne jappaı kásipkerlikti damytýdyń 2017-2021 jyldarǵa arnalǵan «Eńbek» memlekettik baǵdarlamasy aıasynda júzege asyrylýda. Azamattardy jumys kúshi artyq óńirlerden jumys kúshi tapshy óńirlerge qonys aýdarý osy memlekettik baǵdarlamanyń mańyzdy baǵyttarynyń biri bolyp tabylady jáne kelesi mehanızmderdi kózdeıdi:

- kóshýge 35 AEK nemese otbasynyń árbir múshesine 88 myń teńge mólsherinde aı saıynǵy sýbsıdııa tóleý;

- qalalyq aýdandarda turǵyn úıdi jalǵa alýǵa aı saıynǵy shyǵystardy 75 myń teńgege deıin (30 AEK) jáne aýyldyq jerlerde otbasy músheleriniń sanyna baılanysty 53 myń teńgege deıin (21 AEK) óteý;

- jumys berýshilerge keminde 5 adamnyń jumysqa ornalasýyna yqpal jasaǵan jaǵdaıda, 450 AEK nemese 1 mln 136 myń teńge kóleminde sýbsıdııa beriledi;

- qajetti jumys quraldaryn, tehnologııalyq jabdyqtardy, úı janýarlary men qustaryn satyp alý, jańa bıznes-ıdeıalardy iske asyrý úshin memlekettik baǵdarlamanyń qatysýshylaryna 200 AEK-ke deıin qarajat bólinedi;

- qonys aýdarýshylar tehnıkalyq jáne kásiptik bilim alýǵa, qysqa merzimdi kýrstarǵa qol jetkize alady, sondaı-aq olarǵa jumysqa ornalasýǵa járdem kórsetedi.

«Erikti qonys aýdarýdyń maqsaty - eńbek kúshi tapshy óńirlerdi jumys kúshimen qamtamasyz etý jáne óńirlik sáıkessizdikter men demografııalyq teńgerimsizdikti joıý. Erikti túrde qonys aýdarýǵa Almaty, Túrkistan, Jambyl, Qyzylorda, Mańǵystaý oblystarynyń jáne Shymkent jáne Nur-Sultan qalalarynyń turǵyndary qatysa alady. Búgingi kúni qonys aýdarýshylardy qabyldaý úshin tórt óńir bekitildi: SQO, ShQO, Pavlodar jáne Qostanaı oblystary», – dep habarlady mınımtrliktiń halyqty jumyspen qamtý departamentiniń basqarma basshysy Aıjan Japalbaeva.

2019 jyldyń 8 aıynda «Eńbek» memlekettik baǵdarlamasyn iske asyrý sheńberinde eńbek kúshi tapshy óńirlerden 1 myń 650 otbasy nemese 5 myń 918 adam kóship keldi.

Tegter Ekibastuz

Sońǵy jańalyqtar