13 Qyrkúıek, 12:00 519 0 Jańalyqtar Túrkistan International Political Weekly

Kitapqumarlar altynshy ret bas qosty

Almatyda qala kúni merekesine oraı ótkiziletin dástúrli sharalardyń biri – Kitap festıvali. Bıyl da dástúrden jańylmaǵan uıymdastyrýshylar altynshy márte qalalyq kitapqumarlardyń basyn qosty. Jyldan-jylǵa kelýshileriniń qatary artyp kele jatqan sharanyń oqyrmandarǵa bereri kóp.

Bıylǵy festıvaldiń ózindik erekshelikteri jeterlik. Kitap jármeńkesi, oqyrmandarǵa qy­zyqty tanymdyq semınarlar, túrli baspalardyń kitap kórmesinen bólek, shara qatysýshylary tanymal  avtorlarmen júzdesip, ashyq áńgime qurýǵa múmkindik aldy. Dastan Qadyrjanov, Dana Ormanbaeva, Merýert Alonso sekildi qalam­gerler kelýshilerge ózderiniń shyǵarma­shy­lyqtary týraly baıandady. Al  «Blogerler shatyrynda» áleýmettik jeli belsendisi Shyńǵys Muqan oqyrmandarmen júzdesip, olardy qyzyqtyrǵan saýaldarǵa jaýap berdi.

Festıvalǵa 30-ǵa jýyq kitap baspasy men kitap dúkenderi qatysty. Jibek joly dań­ǵylynda ornalasqan alańda arnaıy shatyrlar tigilip, oqyrmandar tórt bólimnen turatyn sharaǵa belsene qatysty. Uıymdas­tyrý­shy­lardyń aıtýynsha, festıvaldiń basty maqsaty – balalar men jastar  arasynda kitap oqý úrdisin na­sı­hattap, olarǵa tehnıka men ǵalam­tor ústemdik qurǵan zamanda da kitaptyń rólin bá­seńdetpeý.

«Kitap oqý deńgeıi tómendep ketti dep jatyrmyz. Sebebi búkil álemdik ádebıet, tanymdyq ádebıet qazaq tiline lek-legimen aýdarylyp jatqan joq. Keńes  úkimeti kezinde klassıkalyq týyndylar jappaı aýdaryldy, sosyn toqtap qaldy. Qazir Elbasynyń bastamasymen myń, júz oqýlyq aýdarylyp jatyr.  Myń dep aýzyma Qudaı beker salmaǵan shyǵar, myńǵa jetsin, tipti odan assyn. Qazaq tilinde sapaly ádebıet keń taraǵan saıyn onyń oqylýy da kóbeıedi dep oılaımyn», – deıdi «Mazmundama» qorynyń jetekshisi Shyńǵys Muqan.

 

Anar BAÝYRJANQYZY

 

Sońǵy jańalyqtar