12 Qyrkúıek, 10:41 394 0 Óndiris Túrkistan International Political Weekly

Jańa maýsym! Jańa beles!

Nur-Sultanda ótip jatqan «Astana Media Week» aptalyǵy aıasynda «Qazaqstan» teleradıokorporaııasy jańa 2019-2020 jylǵy televızııalyq maýsym ónimderiniń tanystyrylymyn ótkizdi.

«QAZAQSTAN» RTRK» AQ Basqarma tóraıymy Lázzat Tanysbaı ulttyq arnanyń 61-shi maýsymy ashylatynyn eske saldy jáne jańa jobalar jóninde baıandady.

«Biz birinshi kezekte tikeleı efırde, boıamasyz, kópshiliktiń qatysýymen ótetin jobalardy kóbeıttik. Maqsat - talapshyl da synshyl aýdıtorııamyzdyń suranysyna jaýap berý. Mysaly, dál búgin qoǵamda qyzý talqylanǵan máseleni kún saıyn keshkisin saǵat 20:30-da Ulttyq arnada tikeleı efırde shyǵatyn «Ashyq alañ»-nan kóre alasyzdar. «Ashyq alañ»-da qoǵam ókilderi men Úkimettiń túrli býyndaryndaǵy jaýapty tulǵalar kezdesip, máseleni ashyq talqylaıdy. Buǵan kórermenderimiz belsendi túrde atsalysyp jatyr», - dedi Korporaııa basshysy.

Sonymen birge, bul maýsymda efırge shyqqan «Niet» jobasynyń erekshe mańyzdy ekenin jetkizdi.

«Baıqasańyzdar, bizdiń qoǵamda túrli kómekke muqtaj adam kóp, sonymen qosa, kómekteskisi keletinder de jetkilikti. Tek joldaryn bile bermeıdi. Mine, sondaı adamdardy biriktiretin «Niet» áleýmettik jobasyn ashýdaǵy maqsatymyz – sapaly televızııalyq shoý jasaý ǵana emes, kez kelgen qıyn jaǵdaıdan birlese shyǵýǵa múmkindik bar ekenin kórsetý. Baǵdarlamanyń alǵashqy efırinde naýqas sábıdi shetelge emdeýge jibersek, kelesi sanynda kópbalaly, jalǵyzbasty ana páterge ıe boldy. Biz aqsha jınamaımyz, stýdııaǵa kelgen adamǵa baǵdarlamany kórip otyrǵan ár qazaqstandyq kómek kórsete alady», - dedi L.Tanysbaı.

TNS Central Asia zertteý kompanııasynyń derekteri boıynsha «Qazaqstan» Ulttyq arnasynyń reıtıngtik kórsetkishteri kóktemmen salystyrǵanda 121 paıyzǵa ósken.

«Reıtıngtiń kóterilýi - búkil ujymnyń jaz boıǵy tynymsyz eńbeginiń nátıjesi. Qara shańyraqtaǵy sabaqtastyqty saqtaý - bizdiń paryzymyz. Bul maýsymda 14 jańa jobanyń tusaýyn kessek, kórermenniń joǵary baǵasyna ıe bolǵan 10 baǵdarlama jalǵasyn tabady. «Tañsholpan», «Dara jol», «Másele», «Parasat maidany» sııaqty baǵdarlamalardy da qaıta usynyp otyrmyz. Salamyzdyń basshysy mınıstr myrza aldymyzǵa úlken talap qoıyp otyr. Qazaqy rýhanı qundylyqtardy saqtaı otyryp, naryqtyq nátıjelerge, básekelestikke kóńil bólýimiz kerek», - dedi telekorporaııa basshysy.

Kúzgi maýsymda qazaq televızııasynyń naǵyz metri atanǵan belgili telejýrnalıst Nurtileý Imanǵalıuly ulttyq arna efırine oralady. «Nur Tileý» baǵdarlamasy 12 qyrkúıek kúni jaryqqa shyqqaly otyr. Sondaı-aq, televızııa salasynda 20 jyldan astam tájirıbesimen qosa, ózindik qoltańbasy bar telejýrnalıst Jaına Slambek «Apta» baǵdarlamasyn tizgindededi.

Sońǵy jańalyqtar