11 Qyrkúıek, 19:45 375 0 Jańalyqtar Túrkistan Gazeti

Asqar Mamın Túrkistanda salynyp jatqan nysandardy aralady

QR Premer-Mınıstri Asqar Mamın Túrkistan oblysyna jumys sapary barysynda QR Tuńǵysh Prezıdenti – Elbasy N. Á. Nazarbaev pen Memleket basshysy Q. K. Toqaevtyń qysqa ýaqyt ishinde Arys qalasyndaǵy turǵyn úıler men nysandardy jyldam qalpyna keltirý boıynsha tapsyrmasyn oryndaý aıasynda qalada júrgizilip jatqan jumystardyń barysyn tekserdi, sondaı-aq Túrkistan qalasynyń ákimshilik, tarıhı-mádenı, áleýmettik mańyzdaǵy nysandarynyń qurylys alańdaryn kórdi. Bul týraly primeminister.kz habarlady.

QR Indýstrııa jáne ınfraqurylymdyq damý mınıstrliginiń málimetteri boıynsha, Arys qalasynda jóndeý jumystarynyń 99,3%-y aıaqtaldy. Nysandarda 134 qurylys kompanııasy, 3,8 myńnan astam jumysshy jumys isteýde jáne 211 arnaıy tehnıka tartylǵan.

Arysta 68 áleýmettik nysan ornalasqan (bilim berý, densaýlyq saqtaý jáne sport mekemeleri), olardyń 64-i – kúrdeli jóndeýdi jáne 4-eýi – tolyqtaı qalpyna keltirýdi talap etti. Búginde 62 nysanda jumystar aıaqtaldy.

QR Úkimetiniń basshysy «Arys-1» temir jol vokzalynyń jóndeýden ótken ǵımaraty men onyń aldyndaǵy skverdi aralap kórdi, «Arys mıneraldy sý» qalpyna keltirilgen kásipornyna bardy, Arys qalasynda úıleri tolyǵymen qıratylǵan 100 otbasyǵa arnalǵan 50 eki páterli kottedjden turatyn jańa shaǵyn aýdannyń qurylysy barysymen tanysty. Barlyq úıler aıaqtalý satysynda tur, ishki árleý jumystary jáne úı jabdyqtaryn ornatý jumystary júrgizilip jatyr. Asqar Mamın Arys qalasyndaǵy qaıta salynǵan jeke úılerge kirip, olardyń turǵyndarymen áńgimelesti.

Túrkistan qalasynda QR Premer-Mınıstri bolashaq halyqaralyq áýejaıdyń qurylys alańynda boldy. Joba túriktiń YDA Holding kompanııasymen birlesip júzege asyrylyp jatyr. Termınaldyń ótkizý qabileti jylyna 3 mln jolaýshyny quraıdy. Nysandy kelesi jyldyń sońynda paıdalanýǵa berý kózdelgen.

QR Úkimetiniń basshysyna ákimshilik, áleýmettik, tarıhı jáne mádenı mańyzdaǵy nysandar qurylysynyń barysy týraly baıandaldy. Asqar Mamın ákimdik, medıa ortalyq, kongress-holl ǵımarattaryn, «Nur-Sultan» alańyn, Tuńǵysh Prezıdent saıabaǵy, Olımpıadalyq rezervtiń sport mektebin, mýzyka mektebin, basseıni bar mektep saraıyn, neke saraıyn, halyqqa qyzmet kórsetý ortalyǵynyń ǵımaratyn, sonymen qatar attrakıondary bar qalalyq saıabaqty, mýzykalyq fontandy, amfıteatr, salynyp jatqan tarıhı-mádenı ortalyqtyń, kelý ortalyǵynyń, Shyǵys monshasynyń, qalalyq Arbattyń qurylys alańdaryn aralady.

Jumys sapary barysynda QR Úkimetiniń basshysyna Túrkistan qalasyn salýdyń Bas jospary kórsetilip, Túrkistan oblysynda júzege asyrylyp jatqan ınvestıııalyq jobalar tanystyryldy.

 

Sońǵy jańalyqtar