11 Qyrkúıek, 20:16 398 0 Jańalyqtar Túrkistan Gazeti

Senat basshysy Iordanııa Elshisimen vızasyz tártip pen tikeleı áýe baǵytyn ashý máselesin talqylady

Parlament Senatynyń Tóraǵasy Darıǵa Nazarbaeva Iordanııanyń Qazaqstandaǵy elshisi Iýsef Abdelganımen kezdesý barysynda ekijaqty yntymaqtastyqty odan ári nyǵaıtý máselelerin talqylady. Bul týraly Senattyń baspasóz qyzmeti habarlady.

Senat Tóraǵasy Iordanııa eli men Korol Abdalla II-niń Taıaý Shyǵystaǵy kúrdeli úderisterdi retteýge qosqan zor úlesin atap ótti.

«Memleketimizdiń jaqyn dosy – Korol Abdalla II-niń óz elindegi qoǵamdyq-saıası ómirdi jáne ekonomıkany reformalaýdaǵy qyzmetin, sondaı-aq halyqaralyq ózekti máseleler jónindegi syndarly ustanymyn joǵary baǵalaımyz. Koroldiń  2017 jylǵy qarasha aıynda Qazaqstanǵa kelgen saparynyń mańyzy zor». Abdalla II-niń Taıaý Shyǵystaǵy beıbitshilik pen turaqtylyq máselelerine qosqan kúsh-jigeri eskerilip, «Iadrolyq qarýsyz álem jáne jahandyq qaýipsizdik úshin Nazarbaev syılyǵynyń» alǵashqy ıegeri atanǵan bolatyn.

Taraptar halyqaralyq jáne aımaqtyq kóptegen máseleler boıynsha Nur-Sultan men Amman qalalary ustanymdarynyń uqsas ekenin atap ótti. Senat Tóraǵasy – Álemdik jáne dástúrli dinder lıderleri Sezi Hatshylyǵynyń basshysy Hatshylyqtyń kezekti otyrysyna daıyndyq jumystary týraly aıta kelip, forýmǵa qoldaý kórsetkeni jáne belsendi qatysqany úshin ıordanııalyq tarapqa alǵys bildirdi.

Elshi Iordanııa azamattary úshin vızasyz tártip engizýdi jáne eki el arasyndaǵy tikeleı áýe qatynasyn ashýdy ótindi. Bul saýda-ekonomıkalyq yntymaqtastyqty keńeıtýge, týrızm áleýetin damytýǵa múmkindik beredi jáne Iordanııa stýdentteriniń kóptep kelýine jol ashady.

Darıǵa Nazarbaeva Elshiniń usynystaryna qoldaý bildirip, eki el arasyndaǵy ózara is-qımyldy nyǵaıtýda vızasyz tártiptiń mańyzdylyǵyn atap ótti.

Sońǵy jańalyqtar