29 Tamyz 2019, 11:16 948 0 Óner Túrkistan Gazeti

Dımashtyń azamattyǵy

Qazaqtyń álemge tanylǵan ánshisi Dımash Qudaıbergenniń barlyq elde tabynýshylary bar. Ony óz kózimen kórip, konertine baryp ánin óz qulaǵymen tyńdaǵysy keletinderdiń esep-sany joq. Sondyqtan ony barlyq memleket óz jerinde konert berýge shaqyrýda.

Dımash bul joly Tatarstanǵa baryp, el astanasy Qazan qalasynda ótken «World Skills Kazan 2019» sharasynyń jabylýynda  óner kórsetken-di.  Sharaǵa qatyspas buryn qazaq ánshisi ákesi Qanat Aıtbaev, do­sy Erlan Bekchýrın jáne shejireshi Maksı Pokıdov tórteýi Qa­zandaǵy balalar hospısine bardy. Onda ol aýyr dertke shaldyqqan Leısan esimdi qyzdy kórýge bardy. Sebebi, Leısan da Dımash óneriniń tabynýshylarynyń biri. Biraq onyń Dımashtyń konertine sáti túspegen. Densaýlyǵynyń kinaraty múmkindik bermegen.

Leısan Reseılik tanymal júrgizýshi Andreı Malahovtyń baǵdarlamasyna qatysyp, onda ol ǵajaıyp daýysty Dımashtyń áni ózine rýhanı kúsh beretinin, onyń ánin tyńdaý arqyly ómirge ǵashyq bola túsetinin aıtqan bolatyn. Mine osyny estigen Dımashtyń komandasy naýqas qyzdyń tilegin oryndaýdy ózderine paryz sanap, Leısandy qýandyrdy.

Sondaı-aq Dımash Tatarstan prezıdentimen kezdesken. Bul jaıynda ol Instagram-daǵy paraqshasynda: «Qazanda 45-World Skills baıqaýynyń jabylý saltanatynan soń el prezıdenti Rýstam Mınnıhanovpen kezdestik. Tatarstan halqyna qonaqjaılylyǵy men aıryqsha iltıpaty úshin alǵys bildire­min!» – dep jazba qaldyrdy.

 

Sońǵy jańalyqtar