22 Tamyz, 18:06 335 0 Jańalyqtar Túrkistan Gazeti

Magıstratýraǵa túsý úshin KT tapsyrǵandardyń jartysyna jýyǵy granttan úmitti

Magıstratýraǵa túsý úshin keshendi testileýge qatysýǵa 30 579 ótinish qabyldanyp, testileýge 28 131 adam qatysqan. Bul testileýge ótinish bergen azamattardyń 92%-yn quraıdy, dep habarlaıdy ortcom.kz tilshisi.

«Keshendi testileý kezinde 217 aýdıtorııa paıdalanyldy. Barlyq aýdıtorııalar uıaly baılanys quraldarynyń sıgnaldaryn basý jáne beınebaqylaý qurylǵylarymen qamtamasyz etildi», - dedi QR Ulttyq testileý ortalyǵy dırektorynyń m.a Dıdar Smaǵulov.

Aıtýynsha, testileý nátıjesi boıynsha 12 853 úmitker nemese testileýge qatysýshylardyń 45,7%-y memlekettik bilim berý granty konkýrsyna qatysýǵa múmkindik aldy.

Aıta ketsek, oqytý qazaq nemese orys tilinde júrgiziletin magıstratýraǵa memlekettik bilim berý grantyn taǵaıyndaý konkýrsyna qatysý úshin shekti ball keminde 75 baldy, aqyly negizde qabyldaý úshin - keminde 50 baldy quraıdy. Bólimder boıynsha: shet tili boıynsha - keminde 25 ball, oqýǵa daıyndyǵyn anyqtaýǵa arnalǵan testileýden - keminde 7 ball, ár beıindi pánnen - keminde 7 ball.

Al oqytý aǵylshyn tilinde júrgiziletin magıstratýraǵa memlekettik bilim berý grantyn taǵaıyndaý konkýrsyna qatysý úshin shekti ball keminde 50 ball, aqyly negizde qabyldaý úshin – keminde 25 ball. Bólimder boıynsha: oqýǵa daıyndyǵyn anyqtaýǵa arnalǵan test boıynsha – keminde 7 ball, ár beıindi pánnen - keminde 7 ball.

Aıta ketsek, 2019 jylǵy 10-15 tamyz aralyǵynda 27 pýnktte magıstratýraǵa túsý úshin keshendi testileý ótken bolatyn.

Sońǵy jańalyqtar