22 Tamyz, 17:49 333 0 Jańalyqtar Túrkistan Gazeti

B. Ýálı Abaı óleńinen úzindi oqý estafetasyn Mekemtas Myrzahmetovke joldady

Prezıdenttiń baspasóz hatshysy Berik Ýálı Abaı óleńinen úzindi oqý estafetasyna qosyldy dep habarlaıdy QazAqparat tilshisi.

«Jaqynda «Jas qazaq» ulttyq aptalyǵyna belgili abaıtanýshy ǵalym, búginde jasy 90-nan asyp otyrǵan ádebıetimizdiń abyz aqsaqaly Mekemtas Myrzahmetov aǵamyzdyń tamasha suhbaty shyqqan edi. Osy suhbatty Memleket basshysy Qasym-Jomart Kemeluly da oqyp, «Bul kisige estafetany óziń berseń jón bolady» dep maǵan arnaıy tapsyrǵan bolatyn. Prezıdenttiń osy tapsyrmasy boıynsha dana Abaıdyń bir óleńin oqymaqpyn», - degen Berik Ýálı «Áýelde bir sýyq muz— aqyl zerek» óleńin oqyp berdi.

Prezıdenttiń baspasóz hatshysy Abaı óleńderin oqý estafetasyna Qasym-Jomart Toqaev ta qoldaý bildirip, aqynnyń óleńin oqyǵanyn eske saldy. Onyń aıtýynsha, Memleket basshysy osy ıgi bastamanyń birrettik naýqan bolyp qalmaýyna úlken mán berip otyr.

«Osyǵan oraı, Prezıdent Ákimshiliginiń Basshysy Qyrymbek Eleýuly elimizdegi dıplomatııalyq ókildikter men shetelderdegi bizdiń elshilikterdi, Qazaqstan halqy Assambleıasyn, Dúnıejúzi qazaqtarynyń qaýymdastyǵyn, Abaıdyń esimin ıelengen joǵary oqý oryndary men kolledjder ujymdaryn, orta mektepterdi, Abaı aýdandary men aýyldaryn, tipti, qala berdi Abaı esimdi azamattardyń bárin qamtyǵan shyn mánindegi jalpyhalyqtyq estafetaǵa aınaldyrý maqsatynda, tıisti mekemelerge arnaıy Tapsyrma-jospar ázirleýge nusqaý berdi. Budan Abaı shyǵarmalaryn oqý estafetasynyń qanshalyqty mańyzdy ekenin ańǵarýǵa bolady», - deıdi ol.

Berik Ýálıdiń aıtýynsha, bul ıgi bastama bir jyl boıy ótip, kelesi jyldyń osy ýaqytyna belgilenip otyrǵan aqynnyń 175 jyldyq mereıtoıyna deıin jalǵasýy tıis.

«Elimizdiń barlyq azamattaryn osy chellendjge atsalysýǵa taǵy da shaqyramyn. Endi osy estafetany belgili abaıtanýshy, ǵalym Mekemtas Myrzahmetov aǵamyzǵa, belgili memleket jáne qoǵam qaıratkeri, ǵalym Amangeldi Aıtaly aǵamyzǵa, jazýshy, alashtanýshy-ǵalym Tursyn Jurtbaı aǵamyzǵa, sondaı-aq dosym Táýbajanǵa jáne jalpy abaıtanýshy, zertteýshi ǵalymdardyń bárine joldaımyn», - dep túıdi ol.

Sońǵy jańalyqtar