21 Tamyz 2019, 12:17 553 0 Tehnologııalar Túrkistan International Political Weekly

Týrıster aýdıogıd kómegine júgine alady

Túrkistandaǵy «Áziret Sultan» memlekettik tarıhı-mádenıet qoryq-mýzeıinde aýdıogıd jobasy iske qosyldy.

Endi kesenege kelýshiler men týrıster atalǵan qurylǵydan qazaq, orys, aǵylshyn tilderinde málimet alyp, saıahat jasaı alady.

Keseneni aralaýshylar tarıhı orynnyń arhıtektýrasy men qurylymy, Iasaýı ómiri, handar men bı-sultandar, tarıhı jádigerlermen tanysqysy kelse aýdıogıd qurylǵysynyń kómegine de júgine alady.

Qazirgi tańda aýdıogıd jobasyna keseneniń ishi ǵana engizilse, jaqyn kúnderi qoryq-mýzeıge qarasty mádenı - tarıhı oryndar men arheologııalyq qazba jumystary jaıly málimetter qamtylatyn bolady dep kútilýde.

«Alǵashqy joba retinde 10 qurylǵy iske qosyldy. Árbir qonaq aýdıogıd qyzmetin tańǵy saǵat 08:00-den keshki 20:00 aralyǵynda 1 saǵat boıy qoldana alady. Atalǵan qyzmet túri – tegin kórsetiledi. Apparat qoldy bolyp ketpes úshin kesene ishindegi jaýapty qyzmetkerlerge kepil retinde jeke qujat tapsyrylýy tıis»,- deıdi tarıhı-mádenı qoryq-mýzeıiniń dırektory Nurbolat Ahmetjanov.

Kesene qyzmetkerleriniń sózinshe, teledıdar pýlti tárizdi shaǵyn qurylǵydaǵy tarıhı aqparattardy belgili bir sandar rettiligi arqyly tyńdaýǵa bolady. Máselen, 1 sany Qoja Ahmet Iasaýıdiń ómiri men muralary bolsa, 2 sany keseneniń salyný tarıhy jáne arhıtektýralyq kelbetine arnalǵan. Aýdıogıd apparatyn eń alǵashqy bolyp paıdalanǵan Franııadan kelgen týrıst qurylǵynyń týrıster úshin óte keremet kómekshi ekenin aıtady.

«Sáýlettik kelbeti jaǵynan stıli erekshe ǵımarattyń salyný tarıhy, taıqazan, tarıhı mańyzy bar úlken bólmeler jaıly aqparattar erekshe qyzyqtyrdy. Aýdıogıd qajetti aqparatty ala otyryp, ońasha serýendeýge de óte qolaıly. Qazaqstanǵa jasaǵan saparymnyń barysynda Túrkistandaǵy jańalyqtyń eń alǵashqy qoldanýshysy bolǵanym men úshin tarıhı jaǵdaı»,- dedi Merlın.

Aıta ketsek, aýdıogıd jobasy úsh tilde qolǵa alynǵanymen aldaǵy ýaqytta túrik, franýz, qytaı tilderin de qosý josparlanýda. Sonymen qatar, kózi nashar kóretin jandarǵa da arnap jədigerler sıpattalǵan mátin jáne dybystyq jazýy bar nusqasy engizilmek.

 

 

Sońǵy jańalyqtar