20 Tamyz, 20:53 325 0 Jańalyqtar Túrkistan Gazeti

Jambyldyq 110 otbasy eldiń soltústigi men shyǵysyna qonys aýdardy

Jyl basynan beri Jambyl oblysynan 110 otbasy Pavlodar, Shyǵys Qazaqstan, Qostanaı óńirlerine qonys aýdarǵan, dep habarlaıdy QazAqparat tilshisi.

Al, sońǵy eki jarym jylda elimizdiń soltústigi men shyǵys aımaqtaryna 400-ge jýyq jambyldyq otbasy qonys aýdarǵan. Bul «Nátıjeli jumyspen qamtýdy jáne jappaı kásipkerlikti damytýdyń 2017-2021 jyldarǵa arnalǵan «Eńbek» baǵdarlamasy aıasynda júzege asyrylýda eken. «Qazir memlekettik jobaǵa qatysqysy keletinder qatary artyp otyr. Bıyl Pavlodar óńirine 13 otbasy kóship bardy. Al Qostanaı men Soltústik Qazaqstan oblystaryna 34 otbasydan jáne Shyǵys Qazaqstanǵa 74 adamnan turatyn 29 otbasy qonys tepti. Olardyń basym kópshiligi jer alyp, dıhanshylyqpen aınalysqysy keletinder. Kóshetin azamatqa 35 aılyq eseptik kórsetkish esebinde kóshý sýbsıdııasy beriledi. Ol kóshetin otbasynyń árbir múshesine tólenedi. Barǵan jerinde ózi tańdap barǵan mamandyǵy boıynsha mindetti túrde turaqty jumysqa ornalastyrylady. Eń basty másele kóship barǵanda baspana usynylady. Ol baspanany jalǵa alý aqysyn da bir jylǵa deıin memleket tólep beredi»,- deıdi oblystyq jumyspen qamtýdy úılestirý jáne áleýmettik baǵdarlamalar basqarmasynyń bólim basshysy Ǵalıjan Meıirmanov.

Mamandardyń aıtýynsha oblystyń Qordaı, Baızaq, Jambyl aýdandary men Taraz qalasynyń turǵyndary kóshýge jıi nıet bildiretin kórinedi. Bıyl qabyldaýshy óńirlerge 352 adam kóshken. Onyń 102-si turaqty jumysqa ornalassa, taǵy 200-deı ótinish bildirgen azamattyń tizimderi jasaqtalyp, qujattary jınaqtalý ústinde eken.

Tegter Kóshi-qon

Sońǵy jańalyqtar