15 Tamyz, 18:45 795 0 Jańalyqtar Túrkistan Gazeti

Tamyz keńesi – ózekti máseleler kóteriletin alań

Jyl saıyn tamyz aıynda ótetin pedagogtardyń tamyz konferenııasynda eldegi bilim, ǵylym salasynyń túıitkildi máseleleri talqylanady. Bıylǵy alqaly jıyn 16-tamyz kúni Nur-Sultan qalasynda ótedi. Bul týraly BAQ.KZ habarlady.

Jıynǵa qatysýshylardyń biri – Taraz qalasyndaǵy Balalardy qoldaý ortalyǵynyń dırektory Aıjan Meırhanova osyǵan baılanysty pikir bildirgen edi.

«Men jetim balalarmen jáne ata-ananyń qamqorlyǵynsyz qalǵan balalarmen jumys isteımin. 2018 jyly K.Sarymoldaev atyndaǵy jetim balalar úıi kámelettik jasqa tolmaǵan balalarǵa arnalǵan ortalyqpen qosylyp, «Qıyn jaǵdaıdaǵy balalardy qoldaý ortalyǵy» bolyp qaıta quryldy. Bizdiń ortalyqta balalardyń ómir súrýi men damýy úshin barlyq jaǵdaı jasalǵan. Jetim balalardy otbasylarǵa ornalastyrý, ıaǵnı potronattyq tárbıeleý, balany qamqorlyqqa alý, asyrap alý boıynsha jumystar jasaýdamyz. Sondaı-aq, otbasylyq tıptegi balalar úıin qurý boıynsha sharalar atqarylýda. Bala asyrap alýǵa nıetti ata-analarǵa keńes beremiz. Balalarǵa áleýmettik kómek kórsetemiz, olardyń múliktik quqyǵyn qorǵaýyna qoldaý bildiremiz. Bizdiń ortalyqtyń túlekteri kásiptik bilim beretin kolledjderge, joǵarǵy oqý oryndarynda bilim alady. Bul jerde de biz olarǵa únemi qoldaý kórsetip otyramyz», - deıdi Aıjan Meırhanova.

Aıjan Meırhanova bıylǵy tamyz keńesinde ata-ananyń qamqorlyǵynsyz qalǵan búldirshinderdi qoldaý máseleleri kóterilip, osy baǵyttaǵy sharalar memleket tarapynan qoldaýǵa ıe bolady degen oıda.

«Elbasy N.Nazarbaev bir sózinde «Jetimder úıi – bul másele meni qatty alańdatady.Qazaqstanda Balalar úıi bolmaýy tıis dep esepteımin» degen edi. Búginde elimizdegi otbasylaryń bala asyrap alýyna jaǵdaı jasalýda. Osylaısha, eldegi balalar úıiniń sany azaıýda. Tamyz keńesi – bilim berý, balalardy qorǵaý salasynda eńbek etetin mamandardyń bas qosyp, urpaq tárbıesindegi keleli máselelerdi qozǵap, ózara pikir almasatyn oryn. Bıylǵy tamyz keńesinde qıyn jaǵdaıdaǵy balalardy qorǵaý, qoldaýǵa baılanysty ózekti problemalar kóteriledi degen oıdamyn», - deıdi Meırhanova

Tegter tamyz keńesi

Sońǵy jańalyqtar