15 Tamyz, 18:35 362 0 Jahan Túrkistan Gazeti

Máskeý mańynda ushaq apatty kúıde qonyp, 55 adam zardap shekti

Reseıdiń «Ýralskıe avıalınıı» áýe kompanııasynyń Airbus A321 jolaýshylar ushaǵy Jýkovskıı áýejaıy aýmaǵyna apatty kúıde qondy. Ushaq Sımferopolge ushyp bara jatqan, dep habarlaıdy QazAqparat TASS-qa silteme jasap.

Jedel qyzmet deregi boıynsha, ol jolaqtan bir shaqyrym qashyqtyqta, Rybakı aýylyna jaqyn jerdegi júgeri alqabyna qonǵan. Barlyq jolaýshylar evakýaııalandy. Ushaqtyń bortynda 230 adam, sonyń ishinde 223 jolaýshy - 41 bala bolǵan.

Jedel qyzmettegi derekkózdiń málimetinshe, ushaqtyń qozǵaltqyshy órtene bastaǵan. Al, bort órtten aman qalǵan. Ushaqtyń qozǵaltqyshy qonyp jatqan kezde janyp, túsip qalǵan. Áýe kompanııasynyń bas dırektory Sergeı Skýratov apattyq qonýdyń durys oryndalǵanyn, ushqyshtardyń áýe kemesiniń órtenip ketýine jol bermegenin habarlady. Oqıǵa saldarynan 55 adam, sonyń ishinde 17 bala zardap shekti. Alty adam, sonyń ishinde beseýi (bireýi bala) Ramenskıı aýrýhanasyna, biri – Jýkovskıı aýrýhanasyna jetkizilgen. Adamdar jeńil jaraqat alǵan. Barlyq jolaýshylar saqtandyrylǵan, sondyqtan ótemaqy alady.

Oqıǵa ornynda 20 jedel járdem brıgadasy jáne eki tikushaq jumys istep jatyr. Áýe tasymaldaýshynyń bas dırektory Sergeı Skýratovtyń deregi boıynsha, ushaqtyń eki qozǵaltqyshy da isten shyqqan. Oǵan qus kirip ketken. Ushaq aıtarlyqtaı zaqymdalyp, taıaý ýaqytta reıs jasamaıdy. Qonyp jatqan kezde onyń tonnalaǵan otyny aǵyp ketken. Kólik prokýratýrasy oqıǵanyń mán-jaıyn anyqtap jatyr. Arnaıy komıssııa qurylyp, qylmystyq is qozǵaldy.

Sońǵy jańalyqtar