14 Tamyz, 20:56 364 0 Jańalyqtar Túrkistan Gazeti

Qazaqstanda Elbasy akademııasy qurylady

Tuńǵysh Prezıdent Qory daryndy balalar men jastardy keshendi qoldaýǵa arnalǵan jobalardy iske asyra bastady, dep habarlaıdy QazAqparat.

Qazaqstan Respýblıkasy Tuńǵysh Prezıdenti – Elbasynyń qory Elbasy N.Á. Nazarbaevtyń tapsyrmasyna sáıkes jas talanttar men kóshbasshylardy qoldaý maqsatynda «El úmiti» jańa bastamasy boıynsha jumys júrgize bastady. Tuńǵysh Prezıdent Qorynyń atqarýshy dırektory Áset Isekeshev: «El úmiti» bastamasynyń mıssııasy – bizdiń daryndy balalarymyz ben jastarymyzdy, sonyń ishinde shetelde turatyn jastardy izdep-taýyp, qoldaýǵa septesý. Biz bul bastamanyń aıasynda elimizdiń jastaryn barynsha qamtýǵa tyrysamyz, olardyń ereksheligin, daryndylyǵyn, ǵylymı jáne kóshbasshylyq áleýetin eskere otyryp, ár balaǵa ózin-ózi damytýǵa teń múmkindik beremiz», - dep atap ótti.

«El úmiti» bastamasy aıasynda Tuńǵysh Prezıdent Qory Úkimetpen, oblys ákimdikterimen, qoǵamdyq birlestikterimen, bilim berý jeke uıymdarymen, bıznes-qaýymdastyǵymen jáne qyzyǵýshylyq bildirgen taraptarmen birlesip jumys istemek. Seriktestermen birge kelesi jobalar júzege asyrylmaq: daryndardy anyqtaý jáne qoldaý ortalyqtaryn qurý; jastar úshin kóshbasshylyq jáne tulǵalyq ósý baǵdarlamasyn jasaý jáne júzege asyrý; Olımpıada jeńimpazdary men olardyń pedagogtaryn qoldaý baǵdarlamasy; talanttar men kóshbasshylardy qosatyn birikken qaýymdastyq qurý; «IQanat» Qorymen birge aýyl balalaryna arnalǵan «Myń bala» zııatkerlik damý baǵdarlamasyn júzege asyrýǵa kómek kórsetý. Jas talanttar men ártúrli saladaǵy kóshbasshylardyń (patrıotızm, sporttyq jetistikter, eriktilik, akademııalyq jetistikter) jan-jaqty damýy úshin jumysty kúsheıtý maqsatynda jeke ósý baǵdarlamasyna belsendi qatysqandar úshin marapattaý baǵdarlamasy jasalady.

Osy mindetterdiń iske asyrylýyn úılestirý úshin Qordyń janynda «Elbasy akademııasy» qurylady. Ol «El úmiti» bastamasyn iske asyrýdy basqarý jónindegi operator retinde áreket etedi. «El úmiti» bastamasynyń aıasynda ádistemeler, taǵylymdamalar baǵdarlamalary men granttar ázirlenedi. Bul árbir óńirde jyl saıyn aýyldar men shaǵyn qalalardan keminde 3 myń daryndy balany anyqtap, keıingi bilim berýde qoldaý kórsetetin talanttardy anyqtaý jáne qoldaý ortalyqtaryn (17 ortalyq) qurýǵa múmkindik beredi. Birinshi kezeńde, eki jyl aralyǵynda ǵylym, ekonomıka, mádenıet, sport jáne qoǵamnyń basqa da baǵyttarynyń memlekettik basqarý salalarynda 500-den kem emes kóshbasshy pýlyn qalyptastyrý josparda bar. Daryndy jastar, kóshbasshylar men oqytýshylarynyń biryńǵaı qoǵamdastyǵy qurylady.

Bastamany ýaqytyly jáne sapaly iske asyrý úshin Tuńǵysh Prezıdent Qory múddeli memlekettik organdarmen birlesip «Jol kartasynyń» jobasyn daıyndady. Sonymen qatar Tuńǵysh Prezıdent Qory bilim berý jáne jeke tulǵany damytý boıynsha jeke Qorlardyń bastamalaryna qoldaý kórsetedi. 2019 jylǵy 1 tamyz kúni Qazaqstan Respýblıkasynyń Tuńǵysh Prezıdenti – Elbasy Nursultan Nazarbaev Qazaqstan Respýblıkasynyń Tuńǵysh Prezıdenti – Elbasy Qorynyń atqarýshy dırektory Áset Isekeshevpen kezdesý barysynda «El úmiti» jáne «Qamqorlyq» bastamalary boıynsha arnaıy tapsyrmalar berdi. «Qor birqatar is-sharalardy júzege asyrý úshin tıisti jumys júrgizip keledi. Biz talantty jastardy jáne damýynda ereksheligi bar balalardy qoldaýǵa baǵyttalǵan «El Úmiti» jáne «Qamqorlyq» atty jańa eki jobany iske asyrýdy bastaımyz. Talantty jastarymyz el ishinde jáne shetelde bilim alýy úshin olarǵa kómektesýimiz kerek. Bul óte paıdaly ári qajetti jumys. Jalpy, Qordyń osy baǵyttaǵy jumysyn jandandyrý kerek», – dedi Qazaqstannyń Tuńǵysh Prezıdenti.

Sońǵy jańalyqtar