13 Tamyz, 18:01 262 0 Bilim Túrkistan Gazeti

Ashat Aımaǵambetov memleket mektep jetispeýshiligi máselesin qalaı sheshetinin aıtty

Bilim jáne ǵylym mınıstri Ashat Aımaǵambetov memleket mektep jetispeýshiligi máselesin qalaı sheshetinin aıtyp berdi. Bul týraly QazAqparat HAA habarlady.

«Mekteptegi oryn jetispeýshiligi máselesin biz Úkimettiń otyrysynda kóterdik. Ózderińiz biletindeı, memleket búgingi tańda bul máselege erekshe nazar aýdaryp, qyrýar qarajat bólip jatyr. Qazirgi tańda elimiz boıynsha 200-ge tarta jańa mektep salynýda. Máselen, Nur-Sultan qalasynda týý men kóship kelý kórsetkishiniń sany artqannan soń bala sany bir jylda 20 myńǵa ósedi. Sol sekildi Almaty oblysynda bir jyldyń ishinde úsh aýysymdy mektepterdiń sany 30-dan 53-ke kóbeıip jatyr. Bul tek týý kórsektishine qatysty emes, kóshi-qonǵa baılanysty másele. Sondyqtan, bul tarapta qazir mınıstrlik jańa mektepterdi salý ádistemesin jasap jatyr», - dedi Ashat Aımaǵambetov Úkimettiń baspasóz ortalyǵynda.

Mınıstrdiń aıtýyna qaraǵanda, osydan birneshe jyl buryn balabaqsha sanynyń jetispeýshiligi óte ózekti másele bolyp turǵan. «Balabaqshalar boıynsha jan basyna qarjylandyrý júıesin engizgennen keıin qazirgi tańda balalardy balabaqshamen qamtý kórsetkishi jaǵynan 95,2 paıyzǵa jettik. Sondyqtan, mektep máselesi boıynsha jekemenshik mektepterdiń úlesin ósirýge úlken nazar aýdarýdamyz. Qazirgi ýaqytta jan basyna qarjylandyrý mehanızmi daıyn. Úkimet otyrysynda kórsetkendeı, qysqa merzimniń ishinde ǵana 25 jańa mektep ashylyp jatyr. Jyl sońyna deıin biraz mektepter ashylady. Biraq, ol da jetpeıdi. Sondyqtan, qaıta qurý mehanızmin engizdik», - dedi mınıstr.

Ashat Aımaǵambetovtyń aıtýyna qaraǵanda, mektep qurylysy máselesine kelgende máselen Nur-Sultan qalasynda jer tapshylyǵy problemasy bar. «Biraq, daıyn turǵan ǵımarattar barshylyq. Sol ǵımarattar arqyly mektepke jaǵdaı jasaıtyn bolsaq, ǵımarattardy da mektep retinde ashýǵa bolady. Sol sebepti, bul óte keshendi másele. Mınıstrlik tıisti sheshim qabyldaıdy», - dedi Bilim jáne ǵylym mınıstri. Eske sala ketsek, búgingi Úkimet otyrysynan keıin tilshilerdiń suraǵyna jaýap bergen elorda ákimi Altaı Kólginov mektep boıynsha qalada 17 myń orynnyń jetispeıtinin habarlaǵan bolatyn.

Sońǵy jańalyqtar