9 Tamyz, 14:31 282 0 Syrtqy saıasat Dınara MYŃJASARQYZY

 Aqorda Qyrǵyzstandaǵy oqıǵalardy kórshi eldiń "ishki sharýasy" sanaıdy

Qazaqstan prezıdenti Qasym-Jomart Toqaev Qyrǵyzstandaǵy oqıǵany kórshi eldiń ishki sharýasy dep sanaıdy. Bul týraly prezıdenttiń baspasóz hatshysy Berik Qurmanǵalı Facebook áleýmettik jelisinde jazdy.

"Qazaqstan prezıdenti Qyrǵyzstandaǵy bolyp jatqan jaǵdaıdy muqııat baqylap otyr. Memleket basshysy baýyrlas kórshi eldegi ahýal Qyrǵyz Respýblıkasynyń ishki sharýasy dep esepteıdi. Qasym-Jomart Toqaev bul jaǵdaı jýyq arada eldiń qoldanystaǵy zańy aıasynda sheshiletinine úmittenedi" dep jazǵan Aqordanyń baspasóz hatshysy.

7 tamyzda Qyrǵyzstannyń Koı-Tash aýylynda eldiń burynǵy prezıdenti Almazbek Atambaevty tergeý oryndaryna kúshpen jetkizý úshin alyp ketýge barǵan qyrǵyz arnaıy jasaǵyna Atambaevtyń jaqtastary qarsylyq tanytqan. Janjal saldarynan, sońǵy málimet boıynsha, oq tıgen arnaıy jasaqtyń bir qyzmetkeri qaza taýyp, 40-tan astam adam jaralanǵan.

Atambaev buǵan deıin tergeý oryndary qylmystyq iske baılanysty jaýap alý úshin úsh ret shaqyrtqanda barmaı qoıǵan soń, arnaıy jasaq Koı-Tashtaǵy onyń úıine barǵan. 8 tamyzda Atambaev ustalyp, Qyrǵyzstan ulttyq qaýipsizdik memlekettik komıtetine jetkizildi.

Qyrǵyz bas prokýratýrasy Atambaevqa 2011-2017 jyldary bılikte bolǵan kezinde "jemqorlyqqa bardy", "qyzmet babyn teris paıdalandy", "zańsyz baıydy" jáne "kánigi baýkespe Azız Batýkaevty túrmeden zańsyz bosatýǵa qatysty" degen sııaqty jalpy sany bes aıyp taqqan. Atambaev ol aıyptardyń bárin joqqa shyǵaryp, ózine qarsy istiń saıası astary bar dep málimdegen.

Bıyl mamyrda Qyrǵyzstan parlamenti burynǵy prezıdentke tıispeýshilik týraly zańǵa ózgertýler engizgen. 27 maýsymda parlament Atambaevty eks-prezıdent jáne tıispeýshilik mártebesinen aıyrǵan soń tergeý oryndary Atambaevty jaýap alýǵa shaqyra bastaǵan.

Sońǵy jańalyqtar