8 Tamyz, 16:24 313 0 Kólik Ásel ÁNÝARBEK

Qonaevtyń kóligi qoıylǵan kórme

Qapshaǵaıda ashylǵan retro avtokólikter kórmesine qazaq halqynyń birtýar perzenti Dinmuhamed Qonaevtyń temir tulpary qoıyldy. Retrokólikterdi jınaýmen aınalysatyn kásipker ashqan kórmeni tamashalaýshylardyń sany da kún sanap artyp keledi.

«Almaty – Óskemen» tas jolynyń boıynda ornalasqan kórmege ótken ǵasyrdyń 50-jyldarynda shyqqan jeńil avtokólikter qoıylǵan. Solardyń biri – Dinmuhamed Qonaevtyń «Chaıkasy». Bul kólikti Dımash Ahmetuly 1985 jylǵa deıin mingen kórinedi. Bul kólikke qazir «Dodj» avtokóliginiń qozǵaltqyshy ornatylǵan. Osy tárizdes tarıhqa toly temir tulparlar kelýshilerdiń nazaryna usynylýda. Kórmege qoıylǵan retro kólikterdiń bárin kásipker Murat Sergebaev ózi jınaqtaǵan. Kólikter qatarynda «Moskvıch», «Volga», «Zaporoje», motoıklderdiń san túri bar. Onyń ústine, retrokólikter salonynan temir tulparlardan bólek ótken ǵasyrda shyqqan magnıtofon, fotoapparat, mýzykalyq aspaptardy da tamashalaýǵa múmkindik bar. 15 jyl ishinde talaı avtomobıldi qalpyna kel­ti­rip, sońynda jınaǵan kólikterin ha­lyqqa kórsetýge bel baılaǵan kásip­ker kórmege kelýshiler qatarynyń artqanyna dán rıza.

Aıta keteıik, buǵan deıin Taraz qalasynda da tuńǵysh ret dál osyndaı retro kólikter kórmesi uıymdastyrylǵan bolatyn. Tanymdyq sharaǵa qatysýshylar HH ǵasyrda zaýyttan shyqqan 50 mashınany tamashalady. Bul sharada kóptiń kózaıymyna aınalǵan kólikter kóshin 1947 jylǵy «Fıat» jeńil kóligi  bastady. «GAZ-67» mashınasynan bastap, sońǵy úlgidegi temir tulparlarǵa deıin qoıylǵan kór­meden kelýshiler kóne úlgidegi «Volga» men «Moskvıch», sondaı-aq jol talǵamaıtyn júrdek djıpterdi de tamashalaýǵa múmkindik aldy. Tipti, atyshýly «Brıgada» serıalyndaǵy kólikter de aıtýly kórmeden tabyldy. Qalyń jurtshylyq nazaryna ekinshi dúnıejúzilik soǵystyń kózin kórgen kólikter de tanystyryldy. Sonyń biri «Ford GPW» avtokóligin ıesi kórmege evakýatormen ákelgen.

Ásel MAQSATQYZY

Sońǵy jańalyqtar