8 Tamyz, 16:01 368 0 Óner Dınara MYŃJASARQYZY

«Bıznes po-kazahskı» fılminiń tórtinshi bólimi túsiriledi

Nurlan Qoıanbaev «Bıznes po-kazahskı» fılminiń tórtinshi bólimin túsirýge kiristi. 2016 jyly bastalyp, kórermenniń ystyq yqylasyna bólengen fılmdi buǵan deıin Almaty, Los-Andjeles, Dýbaı qalasy men Afrıka qurlyǵynda túsirgen bolatyn. Fılmniń tórtinshi bólimin túsirý jumystary Ońtústik Koreıanyń astanasy Seýl qalasynda ótedi dep josparlanýda.

Osyǵan oraı fılm avtory Nurlan Qoıanbaev óziniń Instagram paraqshasynda «Keıipkerlerge arnap eń qyzyqty epızod oılap tapqan 4 adam túsirilim tobymen birge Seýlge attanady» degen baıqaý jarııalady. Búgingi kúni oqyrmandardan 4 myńnan asa ázil túsip úlgerdi.

Fılmniń túsirilimi Almaty qalasynda bastalady. Shyǵarmashylyq top  10 kúndi osy jerde ótkizip, odan soń jalǵasyn túsirý maqsatynda Ońtústik Koreıaǵa attanady. Kartına úlken ekranǵa jeltoqsan aıynda jol tartady.

 «Dástúrdi buzbaı, fılmdi ádettegideı Jańa jyl qarsańynda ekranǵa shyǵaramyz. Bir aı boıy Almaty men Seýlde tynbaı jumys istep, qalǵan ýaqytty postprodakshnǵa arnaımyz. Jańa bólimde senarıster fılmniń alǵashqy bólikterindegi eń utymdy sátterdi saqtap qalýǵa tyrysty. Kórermenge burynǵydaı izgilikke, adamgershilikke, jyly ázilge toly týyndy usynamyz dep ýáde beremiz», - deıdi Nurlan Qoıanbaev.

«Bıznes po-kazahskı v Koree» fılminiń sıýjeti arqyly fılm avtorlary Ońtústik Koreıanyń búgingi kelbetin, káris jastarynyń ómirin, «k-pop» stılin keńinen ashyp kórsetkisi keledi. Fılmde basty rólderdiń birin ádettegideı Gúlnaz Jolanova somdaıdy. Gúlnaz buǵan deıingi úsh bólimde bas keıipkerdiń jubaıynyń róli arqyly kórermenge jaqsy tanys.

Fılmniń jelisi boıynsha otbasylyq qonaq úıde halyqaralyq konferenııa ótýge tıis. Bas keıipker Jomart kelgen qonaqtarǵa jańa tehnıkany tanystyrmaqshy. Osy maqsatpen ol qonaq úıdi joǵary tehnologııaly turmystyq tehnıkamen jabdyqtaýǵa kóshedi. Alaıda shveıar Baqdáýlet ańdaýsyzda klıenttiń baǵaly qurylǵysyn syndyryp alady. Al ol tek qana Seýl qalasynda jóndeletin bolǵandyqtan,  keıipkerlerge Ońtústik Koreıaǵa attanýǵa týra keledi. Buǵan deıingi 3 bólimde de Jomarttyń bıznesmen retinde qalyptasý joly sýrettelse, tórtinshi bólimde ol aıaǵyn nyq basqan kásipker, tulǵa retinde somdalady.

 "Jańa el jaıynda uzaq oılandyq. Alǵashynda Eýropany, Avstralııany bolmasa Reseıdi kózdedik. Biraq áleýmettik jelide júrgizgen saýalnama nátıjesinde Seýlde túsiretin bolyp sheshtik. Ońtústik Koreıamen kelissóz uzaq júrdi. Seýl qalasynyń tynys-tirshiligin seziný úshin byltyr da, bıyl da ol jaqqa ushyp bardyq. Mádenıetimen, halqynyń ómirimen tanysyp, lokaııa tańdadyq», - deıdi bas prodıýser.

2018 jyly kópshilikke usynylǵan «Bıznes po-kazahskı v Afrıke» fılmin kınoteatrlardan 800 myńnan astam kórermen tamashalaǵan bolatyn. Jańa 4-shi bólimniń bıýdjeti shamamen jarty mıllıon dollardy quraıdy dep josparlanýda.

Fılmde rólderdi Jan Baıjanbaev, Darıǵa Badyqova, Gúlnaz Jolanova, Nurlan Qoıanbaev, Ramazan Amantaı, Qajet Smaǵul, Dılnaz Ahmadıeva, Qaırat Qudaıbergen   jáne taǵy basqa akterlar somdaıdy.

Sońǵy jańalyqtar