8 Tamyz, 15:52 317 0 Aımaq "Túrkistan" gazetiniń avtorlary

Ál-Farabı úıi Ystambul tórinde ashyldy  

Túrkııanyń Ystambul shaharynda ál-Farabı atyndaǵy Qazaq Ulttyq ýnıversıteti «Rýhanı jańǵyrý» memlekettik baǵdarlamasy men Elbasy N.Á. Nazarbaevtyń «Uly dalanyń jeti qyry» maqalasyndaǵy negizgi maqsat-mindetterdi júzege asyrý maqsatynda Ál-Farabı úıin ashty. Jobany QazUÝ Ystambul qalalyq ákimdigimen birlese otyryp, Túrki Keńesi, TÚRKSOI jáne Túrkııadaǵy Qazaqstan Respýblıkasy elshiliginiń qoldaýymen júzege asyrdy.

Sharanyń saltanatty ashylýyna Ystambul qalasy ákiminiń oryn­basary Shengúl Arslan (Şengül ALTAN ARSLAN) hanym, Ystambul ýnıversıtetiniń rektory Mahmut Ak, «TÚRKSOI» Bas Hatshysy Dúısen Qaseıinov, tanymal túrki qaıratkeri, ataqty kınoakter Serdar Gókhan, Túrkııa qazaqtary qorynyń tóraǵasy Pazyl Toply, Túrkııadaǵy Qazaqstan Respýblıkasy elshiligi men Ystambuldaǵy QR Bas konsýldyǵynyń ókilderi jáne eýropadaǵy qazaq dıasporasy qatysty. Sonymen qatar, Túrki Álemi etnografııalyq murajaı-kesheninde ótken saltanatty sharaǵa túrik, tatar, bashqurt, qyrǵyz, ózbek, ázirbaıjan jáne basqa da túrki ulttarynyń zııaly qaýymy kelip Uly oıshyldyń úıiniń ashylýyna kýá boldy.

Sharany ál-Farabı atyndaǵy Qazaq Ulttyq ýnıversıtetiniń rektory, akademık Ǵalym Mutanov resmı quttyqtaý sózimen bastap ashty. Ol óz sózinde: «Ál-Farabı babamyzdyń asyl murasyn zerttep, zerdelep, dáripteýde jáne babamyzdyń murajaı-úıin ashýda jan-jaqty qoldaý kórsetip otyrǵan barshańyzǵa, atap aıtqanda: Ystambul qalasy merııasyna jáne qala meri Ekrem Imamoglý myr­zaǵa, Túrki Keńesiniń Bas hatshysy Baǵ­dat Qultaıuly Ámireevke, Qazaqstan Res­pýblıkasynyń Túrkııa Respýblıkasyndaǵy Tótenshe jáne Ókiletti Elshisi Abzal Saparbek­ulyna, TIýRKSOI Túrki mádenıeti halyq­aralyq uıymynyń Bas hatshysy Dúısen Qurabaıuly Qaseıinovke, BUU Órkenıetter Alıansy Túrkııa Ulttyq úılestirý komıtetiniń prezıdenti Bekir Qarlyǵaǵa, Túrki álemi mádenı ortalyǵynyń burynǵy dırektory Kemal Kaptaner myrzaǵa alǵysymyz sheksiz», –  dep jıylǵan jurttyń aldynda uıymdastyrýshylar atynan erekshe iltıpatyn bildirdi.

Ystambul qalasy ákiminiń orynbasary Shengúl Arslan hanym óz quttyqtaý sózinde «Uly Ál-Farabı, tek Shyǵys álemi úshin ǵana emes, Batys elderi úshin de aıtýly oqıǵa. Ol tek túrki dúnıesiniń ǵana emes, barsha adamzatqa ortaq maqtanysh. Ǵulamanyń ǵylymı muralaryn zertteý, nasıhattaý, olardy keleshekke jetkizý boryshymyz. Endi osy úıi arqyly Ál-Farabıdi, onyń mol murasyn kúlli túrki jurty jaqyn tanysatyn boldy. Sondyqtan da osy jobaǵa uıytqy bolyp, júzege asyrǵan Ǵalym Mutanuly bastaǵan Qazaqstan Ulttyq ýnıversıteti ujymyna erekshe alǵysymdy bildiremin» dep, aǵynan jarylyp, Ýnıversıtet basshysyna «Ystambul» atty albom syılady. Óz kezeginde Ǵalym Mutanuly qazaqy saltpen Shengúl hanymnyń ıyǵyna kamzol jaýyp, Ál-Farabı kádesyıyn estelikke syıǵa tartty.

Sondaı-aq, Ǵ. Mutanov ýnıversıtet atynan Ál-Farabı úıiniń Ystambul shaharynda ashylýyna erekshe eńbek sińirgen Túrki Álemi etnografııalyq murajaı-kesheniniń burynǵy jáne qazirgi basshylaryn «Ál-Farabı» medalimen marapattady.

 

J.Áshim

Sońǵy jańalyqtar