3 Tamyz, 11:29 372 0 Jahan Turkystan Support

Tramp sózinde tura ma?

AQSh prezıdenti Donald Tramp 2020 jyly ótetin prezıdenttik saılaýǵa deıin Aýǵanstandaǵy AQSh áskerı kúshterin elge qaı­tarýdy kózdep otyr.

Vashıngtonda ótken kezekti otyrysta AQSh-tyń memlekettik hatshysy Maık Pompeo Tramptyń osy bir jos­pa­rymen bólisti. Al bul máselege qatysty sarap­shy­lar­dyń pikiri san alýan. Keı sarapshylar Qurama shtattardyń bul sheshimine qoldaý bildirse, endi biri halyqaralyq qoldaýsyz Aýǵanstanda lańkesterdiń yqpaly artyp ketýi múmkin ekenin alǵa tartýda. Ázirge naqty qansha áskerdiń shyǵarylatyny belgisiz. Maık Pom­peo­nyń málimdemesine súıensek, barlyq ame­rı­kalyq ásker eline oralýy kerek. Búginde Aýǵanstan aýmaǵyndaǵy áskerdiń sany 14 myńdy quraıdy.

Aq úı basshysy Donald Tramp Aýǵan­standa 18 jylǵa sozylǵan soǵys aıaqtalýy kerektigin aıtyp, ondaǵy ásker­lerin eline qaıtarý týraly sheshim qabyldady. Bul úderis 2020 jyldyń 3 qarashasy, ıaǵnı pre­zıdenttik saılaýǵa deıin aıaqtalýy tıis. Aıta keteıik, Donald Tramp 2016 jyly saılaýaldy naýqanynda amerı­ka­lyq áskerlerdi Aýǵanstannan shyǵaramyn dep ýáde bergen edi. Alaıda ol prezıdenttik laýazymǵa taǵaıyndalǵan soń kerisinshe, Aýǵanstandaǵy áskerlerin kúsheıte tústi.

«Maǵan Amerıka qurama shtattarynyń prezıdentinen tikeleı tapsyrma kelip tústi. Ol óńirdegi uzaqqa sozylǵan soǵys­qa núkte qoıý kerektigin aıtty. Aýǵan­stannan áske­rı­lerdi shyǵarý tapsyrmasyn berdi. Jáne bul úderisti tek biz ǵana jasaımyz. Kóptegen elder bul sheshimdi qoldap otyr. Eýropa elderi de. Óńirdegi shet eldik áskerıler sany azaıady dep oılaımyz», – dedi AQSh Memlekettik hatshysy Maık Pompeo.

Aýǵanstandaǵy áskerı operaııany AQSh tarapy 2001 jyly bastaǵan bolatyn. 11 qyrkúıektegi teraktige jaýap retinde óńirge amerıkalyq áskerlerdi jibere bastady. Pentagonnyń «Erkindik» operaııasy 2014 jyly aıaqtalǵanymen, lańkestik yqpaldy baqylaýda ustaý úshin amerıkalyq áskerıler el aýmaǵyna búginge deıin jibe­ri­lip otyrdy. Aýǵan­stan­dyq depýtat elden sheteldik ás­kerler ketse, «lańkestik yqpalmen eldiń qarýly kúshteri kú­rese almaıdy» degendi aıtady.

Aýǵanstan áskeri bul halyqaralyq qoldaýsyz «Talı­ban­darǵa» qarsy tura ala­tyny da kúmándi. Aýǵanstanda turaq­ty­lyq ornatý úshin 2018 jyldyń maýsym aıynan beri AQSh tarapy «Talıban» radıkaldy tobynyń ókilde­rimen tikeleı kelissózder júrgizip keledi. Pompeonyń aıtýynsha, taraptar ortaq kelisimge kelip otyr. Iaǵnı, sheteldikter áskerlerin elden shyǵarady, tıisinshe «Talıban» radıkaldy qozǵalysy óńirde lańkestik toptyń qaptap ketpeýine ýáde beredi. Degenmen, qansha kelissózge qaramastan, óńirde so­ǵys áli de jalǵasyp jatyr.

 

Sońǵy jańalyqtar