30 Shilde, 11:19 552 0 Kólik Túrkistan Gazeti

Erekshe kórme ótti

Tarazda tuńǵysh ret avtokólikter kórmesi ótti. Onda qoıylǵan kóne temir tulparlardan bastap sońǵy úlgidegi óte qymbat kólikterdiń kollekııasy kópshilikti tánti etti.

Shahar ortalyǵyndaǵy «Jastar» alleıasynda ótken erekshe kórmege halyq óte kóp jınaldy. Sharany «Djıp klýb Taraz» toby jáne oblys ákimdigi birlese uıymdastyrǵan.

Uıymdastyrýshylar kórmege qaladaǵy eń ádemi degen 50-ge jýyq avtokólik jáne 10 shaqty motoıkl arnaıy tańdalyp alynǵanyn aıtady. Markasy jaǵynan birinen biri oza shapqan temir tulparlar kózdiń jaýyn alyp, kórýshilerdi qyzyqtyra tústi. Kórmege kelýshiler ózderine unaǵan kóliktiń janynda fotoǵa túsip, qyzyqtap jatty. Tipti atyshýly «Brıgada» serıalyndaǵy kólikter de bul kórmeden tabyldy. Uıymdastyrýshylar qala berdi sonaý soǵystan beri sary maısha saqtalǵan avtokólikterdi de munda ákelgen.

«Festıvalge 50-ge jýyq temir tulpar qatysty. Arasynda áıgili «Brıgada» serıalynda boı kórsetken Gaz 21 Volga, Lincoln Town Car avtokólikteri de bar. Sondaı-aq, qalyń jurtshylyq nazaryna ekinshi dúnıejúzilik soǵystyń kózin kórgen kólikter de tanystyryldy. Sonyń biri Ford GPW avtokóligin ıesi kórmege evakýatormen ákeldi. Kún kózine shaǵylysqan Mersedes pen avtoáýesqoılardyń qyzyǵýshylyǵyn týdyrǵan BMV-ni de dál osy jerden taptyq»,- deıdi «DJIP KLÝB TARAZ» tobynyń múshesi Evgenıı Dýıýnov.

Kórmege qoıylǵan kólikterdiń ishindegi eń kónesi — «GAZ – 67» avtomashınasy. Bul temir tulpardyń ıesi – Ábdýjálıl Qurbanov. Uzyn sany 20 avtokólik qurastyrǵan ol munda onyń altaýyn ákelgen.

«Jastar» jyly men Jambyl oblysynyń 80 jyldyǵyna oraılastyryp ótkizilgen avtokólikter kórmesin endi jyl saıyn ótkizý josparlanyp otyr.

 

Sońǵy jańalyqtar