23 Shilde, 09:47 313 0 Bilgenge marjan Túrkistan Gazeti

Múmkindigi shekteýli jandarǵa arnalǵan jazǵy mektep ashyldy

Elordada múmkindigi shekteýli jandarǵa arnalǵan frılanserler jazǵy mektebi óz jumysyn bastady.

«Bul ıdeıa maǵan osydan 1-2 jyl buryn keldi. Men ol kezde múmkindigi shekteýli jandarmen jumys istedim. Sonda ol kisiler qashyqtyqtan jumys isteý múmkindigi qarastyrylsa, bizge qalada júrip turý qıyn degentuǵyn. Sodan oıymdy júzege asyrý maqsatynda osy jobany qolǵa aldym. Jobamnyń tujyrymdasyn alyp qalalyq ákimdikke bardym, ákimdik birden qoldaý bildirdi», - dedi joba ıdeıasynyń avtory Ulan Ábishev.

Atalǵan jobanyń maqsaty – múmkindigi shekteýli jandardy frılanser bolyp jáne áleýmettik jelilermen jumys isteýge úıretý.

«Frılanserler kýrsyna 36 elordalyq tirkelip, nıet bildirdi. Búgin kýrstyń alǵashqy kúni onda 20 adam dáris alyp jatyr. Josparǵa sáıkes olar 3 kún oflaın túrde dáris alady jáne 3 kún qashyqtyqtan oqıdy. 1 aptaǵa sozylatyn kýrs sońynda qatysýshylarǵa arnaıy sertıfıkat beriledi. Oqytýshy retinde frılanserlik jumys isteý tájirıbesi bar jáne áleýmettik jelilerdiń belsendi mamandaryn shaqyrdyq», - dedi ol.

Onyń aıtýynsha, pılottyq nusqa retinde qolǵa alynǵan bul joba sátti júzege asyrylsa, aldaǵy ýaqytta respýblıkalyq deńgeıde qolǵa alynatyn bolady.

«Bizdiń túpki maqsat – múmkindigi shekteýli jandarǵa arnalǵan frılanserlerdiń ulttyq jelisin qurý. Iaǵnı, bul joba oıdaǵydaı júrgizilse, aldaǵy ýaqytta respýblıkanyń barlyq óńirlerinde ashylatyn bolady. Taǵy bir aıtyp ótetin jaıt, biz qatysýshylardy tirkegende múmkindiginshe ózdiginen júrip tura almaıtyn jandardy qatystyrýǵa tyrystyq. Sebebi ol kisilerdiń jumys isteýge qabileti bolǵanymen, olarǵa jumys berýshiler tabyla bermeıdi», - deıdi joba avtory.

 

Sońǵy jańalyqtar