19 Shilde, 16:40 379 0 Jańalyqtar Túrkistan Gazeti

Senat depýtattarynyń aýylǵa sapary

Batys Qazaqstan oblysynda jumys babyndaǵy saparda júrgen Parlament Senatynyń depýtattary Erbolat Muqaev pen Narıman Tóreǵalıev Syrym aýdanynda bolyp, ataýly áleýmettik kómekti jańa úlgide alyp otyrǵan analarmen kezdesti.

Bıyl aýdanda ataýly áleýmettik kómek jańa úlgi boıynsha 469 januıaǵa taǵaıyndalǵan. Kezdesýde otbasylardyń atynan sóz alǵan analar memleket tarapynan berilgen múmkindikterdi balalardyń bilim alýy, aýladaǵy óndiris jáne turǵyn úı máselelerin sheshý jolynda paıdalanyp jatqandaryn aıtty.

«Áleýmettik kómekti qarjylaı tabys dep emes, baqýatty ómirge jetý jolyndaǵy kómek dep túsiný kerek. Qaı máseleniń de áleýmettik ári quqyqtyq qyry bolady. Jańa úlgidegi ataýly áleýmettik kómekti alý barysynda da quqyqtyq máseleler oryn alyp jatqany jasyryn emes. Tabysyn jasyrý, kómek tıesili bolýy úshin qasaqana ajyrasý sekildi jaıttar bizdi qatty alańdatady. Biz januıalarda balalardy eńbekke baýlýdy ótiner edik. Memleket úshin eń qaýipti nárse – tárbıelenbegen bala. Balalar ata-anasynan úkimetke arqa súıeı berýdi, únemi bireýden qoldaý, demeý kútýdi úırenbeı, óz betterimen adamdyq jolyna túsýdi úırense eken», – dedi senator Erbolat Muqaev.

Senatorlar aýyl aqsaqaldarymen, sharýalarmen jáne okrýg ákimderimen júzdesti. Aýdandyq ardagerler Keńesiniń tóraǵasy Ánýarbek Ǵalymovtyń kótergen máselesi tek Syrym aýdanynyń ǵana emes, eldegi barlyq qarııalarǵa ortaq boldy. «1938 jyldan bastap týylǵan ardagerlerge shıpajaıda demalý múmkindigin qarastyrý kerek. Zańǵa ózgeris engizilse degen usynys aıtamyz», - dedi ol. Aýdandyq ardagerler Keńesiniń múshesi Sydyq Tajmuqan nesıelerge dıfferenıaııa jasaý, sonymen qatar, jobalyq smetalyq qujattamanyń merzimi ótip ketken jaǵdaıda, jobany keri jasaqtamaý úshin tek qana baǵasyna túzetý engizý qajettigin usyndy. Bul memlekettiń qarjysy men ýaqytyn únemdeýge úles bolar edi dedi ol. Sondaı-aq turǵyndardyń sýdy únemdep paıdalaný, sý júıesin jańartýǵa qosymsha qarajat bólý, balyq sharýashylyǵyna biryńǵaı nesıe beretin bank ashý qajettiligi aıtyldy.

«Qazirgi tańda kóptegen sharýalar maldy jeke turǵyndardan alady. Sharýa qojalyqtarǵa mal alǵanǵa Úkimet tarapynan sýbsıdııa tólenedi. Osyndaı demeý qarjy jeke aýyl turǵyndaryna da tólense deımiz. Aýdan aýmaǵyndaǵy oryn alatyn tótenshe jaǵdaılar baılanysty jaqsy sapaly tehnıka alyp berý múmkindigin qarastyrýdy da suraımyz. Asyl tuqymdy mal basyna bólinetin sýbsıdııa tóleý máselesi de nazarlaryńyzda bolsyn», - dedi kásipker Ǵanımat Nurmuhanov. Aýdandyq máslıhat depýtaty Vladımır Djýmagalıev qys mezgilinde joldy kútip ustaý úshin sharýa qojalyqtarymen kelisimshart jasaqtalatynyn, sol jumysty júrgizýge bólinetin qarjy tolyǵymen aldyn-ala aýdarylsa degen usynysty aıtty. V.Djýmagalıev aldyńǵy usynystarmen úndes «Jumyssyz júrgen azamattarǵa» arnalǵan arnaıy zań shyǵarý, kásiptik-tehnıkalyq bilim alǵan jas mamandardy aýylǵa jumysqa tartqan kezde 4-5 jylǵa kelisimshartqa otyrǵyzý máselelerin de qozǵady. Senat depýtattarymen bolǵan kezdesýde syrymdyqtar aýdan ortalyǵynan 300-400 balaǵa arnalǵan gımnazııa salýǵa kómektesýdi surady.

Kezdesýden keıin senatorlar Jympıtyda «Bıznestiń jol kartasy 2020» baǵdarlamasy arqyly júzege asyrylǵan kásipkerlik joba – «Everest» sýpermarketinde bolyp, saýda ortalyǵynyń jumysymen tanysty. Senat depýtattary sýpermarkettegi baǵalarǵa nazar aýdaryp, kásipkerlerge taýar baǵalaryn turaqty ári qoljetimdi bolýy týraly aıtty.

Sońǵy jańalyqtar