19 Shilde, 15:46 432 0 Qaýipsizdik Túrkistan Gazeti

1 aptada 61 adam sýǵa batty

QR IIM Tótenshe jaǵdaılar komıtetiniń tóraǵasy Vladımır Bekker ótken aptada elimiz boıynsha 61 adam sýǵa batyp, kóz jumǵanyn aıtty. 

Komıtet basshysy elimizdegi ystyq shilde aıynyń sońyna deıin jalǵasatynyn atap ótti. Sondyqtan qazaqstandyqtarǵa sýǵa shomylý erejesin saqtaýǵa keńes berdi. Onyń aıtýynsha, tyıym salynǵan jerlerde shomylý adam ómiri úshin qaýipti.

"Ókinishke qaraı, ótken aptada elimizdegi sý qoımalarynda 61 adam sýǵa batyp óldi. Onyń 22-si bala. Tótenshe jaǵdaılar komıteti jáne óńirlik qurylymdar júrgizgen keshendi is-sharalar nátıje bermeı jatyr. Adamdar qarapaıym qaýipsizdik erejelerin saqtamaıdy. Tyıym salynǵan jerlerde shomylady, balalaryn qaraýsyz qaldyrady. Saldarynan osyndaı qaıǵyly oqıǵa bolady", - dedi Vladımır Bekker TJD-niń ǵımaratynda ótken brıfıngte.

Sonymen qatar ol adam ólimi kóp tirkelgen oblystarǵa toqtaldy.

Aqmola oblysynda bir aptada 11 adam sýǵa ketti. Onyń 3-ýi bala. Almaty oblysynda 8 adam, Atyraý oblysynda 4 adam, Jambyl oblysynda 8 adam, Pavlodar oblysynda 8 adam qaza tapty. Mysaly, Pavlodar oblysynda birden 3 bala sýǵa ketti. Týystar ózen jaǵasynda demalǵan. Ata-analar balalaryna qaramaǵan. Saldarynan osyndaı qaıǵyly oqıǵa tirkeldi", - dedi komıtet tóraǵasy.

Vladımır Bekker 2019 jyldyń 1 qańtarynan beri 237 adam sýǵa batqanyn, onyń 90 bala ekenin atap ótti.

"Sondyqtan barlyq turǵynǵa qarapaıym qaýipsizdik erejelerin saqtaýdy ótinip suraımyn", - dep túıindedi sózin ol.

Sońǵy jańalyqtar