19 Shilde, 15:18 393 0 Qoǵam Túrkistan Gazeti

Jol boıyndaǵy dárethanalar nege máselege aınaldy?

«QazAvtoJol» kompanııasy óz tarapynan demalys alańdary men aıaldamalardaǵy dárethana máselesin sheshý úshin ınvestıııalyq konkýrs jarııalap otyr.

Atalmysh konkýrs jyldyń úshinshi toqsanynan bastap jarııalanbaq. Bastama ıesi – «QazAvtoJol» ulttyq kompanııasy.

«Úshinshi toqsanda eki kezeńdik konkýrs bastalady. Birinshi kezeńde ınvestorlar jaıly dárethananyń óz nusqasyn usynady. Ekinshi kezeńde úzdik joba sapasymen birgen kútip-ustaý shyǵyndaryna qaraı irikteledi. Dárethanany jylytý úshin «jasyl tehnologııa» qoldanýyna da bolady. Bul turǵyda eshqandaı shekteý joq. Tipti jalǵyz dárethanamen shektelmeı, janynan servıs ortalyǵyn ornatýyna da bolady. Eń bastysy, kútim shyǵyndary qyzmet sapasyna saı bolýy kerek», - deıdi kompanııanyń strategııalyq josparlaý, bıznesti damytý jáne aqparattandyrý departamentiniń dırektory Rýstam Isaev.

Ulttyq kompanııanyń basqarma tóraǵasy Ulan Álipovtyń málimetine súıensek, konkýrsta jobasy úzdik dep tanylǵan merdiger 7 jyl boıy jolaýshylarǵa qyzmet kórsetedi.

«Merdigerler qazirdiń ózinde qyzyǵýshylyq tanytyp otyr. Olar óz aqshasyna zaman talabyna saı dárethana ornatýy kerek. Sony jeti jyl boıy ózderi kútip ustaıdy. Al bizdiń kompanııa kútip ustaǵan shyǵyny úshin aqy tóleıdi. Aldyn ala esep boıynsha, ondaı shyǵynnyń kólemi bir dárethanaǵa aıyna 500 myń teńge bolýy múmkin», - deıdi ol.

Jalpy, 2021 jylǵa deıin respýblıkalyq mańyzdaǵy joldardyń boıynan 304 jaıly dárethana ornatý josparlanǵan eken.

«2019-2021 jyldarǵa dep respýblıkalyq joldardyń boıynda 304 sanıtarlyq torap orny bekitilgen. Onyń ishinde 109 oryn jańadan salynyp jatqan joldardyń boıynan belgilendi. Qoldanystaǵy joldar boıynda 195 oryn anyqtalyp otyr. Onyń bárin ınvestorlar jeke qarajatyna ornatýy kerek. Jyl basynan beri osy talaptardyń barlyǵyn saqtaǵan 20 servıs nysany salyndy. Jyl sońyna deıin olardyń qataryn taǵy 25 nysan tolyqtyrady», - deıdi departament dırektory Rýstam Isaev.

Onan ózge Respýblıkalyq mańyzdaǵy joldardyń boıynda jabdyqtalǵan dárethanasy joq servıs nysandarynyń jumysyna tyıym salynýy múmkin. Ortalyq kommýnıkaııalar qyzmetinde ótken brıfıng barysynda avtomobıl joldary týraly zańǵa osyndaı ózgeris engizý usynyldy.

«QazAvtoJol» ulttyq kompanııasynyń strategııalyq josparlaý, bıznesti damytý jáne aqparattandyrý departamentiniń dırektory Rýstam Isaev sońǵy kezde jol boıyndaǵy servıs nysandaryna qoıylatyn talaptardyń qatańdatylǵanyn aıtady.

«Sońǵy eki jylda ulttyq standartqa sáıkes keletin jol boıyndaǵy servıs nysandarynyń sany 33 paıyzdan 47 paıyzǵa ósti. Búginde respýblıkalyq jáne halyqaralyq joldar boıynda 1819 servıs nysany qyzmet etedi. Sonyń tek 850-inde ǵana jabdyqtalǵan jaıly dárethana bar. 2018 jyly 12 pavılon qoıylǵan bolatyn.

«QazAvtojol» baqylaýyna qaraıtyn joldarda 23 jabdyqtalǵan dárethana, 880 jylytylmaıtyn dárethana bar. Onyń 411-i demalys bazalarynyń aýmaǵynda, 469-y negizgi jol boıynda tur», - deıdi ulttyq kompanııa ókili.

Rýstam Isaevtyń aıtýyna qaraǵanda, jol boıyndaǵy servıstiń sapasyn retteıtin ulttyq standartta dárethanaǵa qatysty naqty talaptardyń bolmaýy servsı nysandaryn bosańsytyp otyr.

«Qoldanystaǵy talaptar jol boıynda salqyn dárethanalar qoıýdy shektemeıdi. Ulttyq standartta mindetti talap bolmaǵandyqtan, servıs ortalyqtary jabdyqtalǵan jaıly dárethana ornatpaıdy. Avtomobıl joldary týraly zańǵa ózgerister engizilmek. Zań jobasy qazir talqylanyp jatyr. Servıs ıeleri abattanǵan dárethana ornatpasa, olardy jol boıynda kásip ashýǵa jibermeý týraly usynystar tústi»,- deıdi departament dırektory.

 

Sońǵy jańalyqtar