18 Shilde, 11:30 418 0 Bilim Dınara MYŃJASARQYZY

Áldekimderdiń álipbı jaıly «áńgimesi» jalǵan eken

Bir-eki kúndikte aqparat quraldarynda «latyn álipbıine kóshý máselesi kesheýildeıdi» degen aqparat jeldeı esti. Osyǵan oraı, Qazaqstan Respýblıkasy Mádenıet jáne sport mınıstrliginiń Til saıasaty komıtetiniń tóraǵasy Ǵalymjan Meldeshovtiń latyn grafıkasyna kóshý merzimin uzartýǵa qatysty aqparat týraly túsinikteme berdi.

«Qazaq tilin latyn grafıkasyna kóshirý jumystary 2030-2035 jyldarǵa deıin sozylatyndyǵy týraly «Izvestııa» gazetine shyqqan materıal shyndyqqa sáıkes kelmeıdi. Tuńǵysh Prezıdent-Elbasynyń Qazaq álipbıin kırılıadan latyn grafıkasyna kóshirý jónindegi Jarlyǵyna sáıkes, Qazaqstan Respýblıkasy Úkimeti tarapynan «Qazaq tili álipbıin latyn grafıkasyna 2025 jylǵa deıin kezeń-kezeńimen kóshirý jónindegi is-sharalar jospary» (QR Premer-Mınıstriniń 13.03.2018 j.№27-ó.) bekitildi.

Is-sharalar josparyn oryndaý 3 kezeńge bólingen jáne atqarylatyn sharalar kezeń-kezeńimen naqty kórsetilgen», –  dep atap ótti Ǵ.Meldesh.

«Osy rette Úkimet tarapynan atqarylyp jatqan jumystar josparlanǵan merzimge sáıkes, júrgizilip jatqanyn habarlaımyz.

Birinshi, 2018-2020 jyldary normatıvtik quqyqtyq aktilerdi jetildirý boıynsha jumystardy júrgizý, jańa álipbıde emle erejesin jáne latyn álipbıine mátindik qaıta kóshirýge arnalǵan IT qosymshasyn ázirleý;

Ekinshi, 2021-2023 jyldary memlekettik, jergilikti atqarýshy organdar qabyldaǵan qoldanystaǵy normatıvtik quqyqtyq aktilerdi, pasporttar, kýálikter jáne basqa da qujattardy latyn qarpine aýystyrý;

Úshinshi, 2024-2025 jyldary ortalyq atqarýshy organdar men jergilikti atqarýshy organdar, memlekettik BAQ, sondaı-aq bilim berý uıymdarynyń is qaǵazdaryn latyn qarpine kóshirý.

Sonymen qatar aǵymdaǵy jyly Tilderdi damytý men qoldanýdyń 2020-2025 jyldarǵa arnalǵan memlekettik baǵdarlamasy jobasy ázirlenýde. Atalǵan baǵdarlamanyń negizgi maqsattarynyń biri latyn negizdi qazaq álipbıin jańǵyrtý jumystaryn jetildirýge baǵyttalǵan.

Osy rette Úkimet tarapynan atqarylyp jatqan jumystar josparlanǵan merzimge sáıkes júrgizilip jatqanyn habarlaımyz», –  dep túsindirdi.

 

Toǵjan Tólegen

Sońǵy jańalyqtar