17 Shilde, 20:56 389 0 Taıqazan Túrkistan Gazeti

Shalkódedegi shopandar toıy

Almaty oblysy, Raıymbek aýdanyna qarasty Shalkóde jaılaýynda shopandar toıy ótti. Ekinshi jyl qatarynan uıymdastyrylyp otyrǵan sharada úzdik malshylar marapattalyp, qymyzmuryndyq merekesi toılanyp, ol ulttyq at sporty oıyndaryna jalǵasty.

Teńiz deńgeıinen 2500 metr bıiktikte ornalasqan Shalkóde jaılaýynda bir kezderi 500 myńǵa deıin qoı jaıylǵan. El-jurt jaılaýǵa kóship, dúbirli toı ótkizip, shopandar toıyn erekshe atap ótetin. Igi dástúrdi byltyr óz aldyna enshisin alyp qaıta qurylǵan Raıymbek aýdanynyń basshylyǵy qolǵa alyp, jandandyrdy. Aýdan jurtshylyǵy da birden qoldap ketti. Shopandar toıy aıasynda aýdannyń mal sharýashylyǵyn asyldandyrý, jáne mal ónimderin arttyrýǵa baǵyttalǵan semınar-keńes ótti. Qazaqstandyq ǵalymdar mal tuqymyn asyldandyrý boıynsha tájirbıelerimen bólisip, ónimdilikti arttyrýdyń alǵy sharty ǵylymmen tyǵyz jumys isteý kerektigin aıtty. Qazirgi tańda aýdanda qoı-eshki sany 310 myńǵa jýyqtady. Iri qara sany 60 myń bolsa, jylqy 40 myńǵa jetti. Saltanatty jıyn barysynda úzdik nátıje kórsetken birqatar malshylar marapattaldy.

Sondaı-aq jaılaý toıy aıasynda Almaty oblystyq Qazaqstan halqy Assambleıasynyń qoldaýymen qymyzmuryndyq merekesi de atap ótildi. Jelini maılap, bıeni baılap, qymyz ashytyp, dastarhan mázirin usynǵan aýdan jurtshylyǵyna jınalǵan qonaqtar tánti boldy. Aıta ketý kerek, jaılaýǵa erinbeı kóterilgen qaýym qatarynda ataqty sportshylar, aqyn-jazýshylar, qoǵam qaıratkerleri men jýrnalıster qaýymy kóp boldy. Shara sońynda «Jetisý júırigi» atty IV oblystyq at sport oıyndary uıymdastyryldy. Báıgeniń birneshe túrinen jarystar ótip, qonaqtar qyz qýý, aýdaryspaq, qazaq kúresi, qoshqar kóterý jáne tazy júgirtý sııaqty ulttyq oıyndardy tamashalady.

 

Sońǵy jańalyqtar