15 Shilde, 16:51 351 0 Shoý-bıznes Túrkistan Gazeti

"Baqytty bala" tanytqan balǵyn juldyzdar

Álemge jarqyn da jas juldyzdardy syılaǵan "Baqytty bala" II ashyq festıval konkýrsynyń bas júldegerleri 2 000 000 teńge aldy. Al reseılik "Golos. Detı" televızııalyq shoýynyń juldyzy "Baqytty bala" atty qazaqstandyq festıval konkýrsynyń jeńimpazy atandy. 

Nur-Sultan qalasynyń kishkentaı turǵyny, jas vokalıs Aıkerim Tileýbek "Baqytty bala" II ashyq festıval konkýrsynda "Golos. Detı" festıval konkýrsynyń jeńimpazyna aıtarlyqtaı básekelestik tanytty. Iaǵnı, "DımashAlı" prodıýserlik ortalyǵy ǵalamdyq deńgeıdegi taǵy bir jańa da jas óner juldyzyn tanytty. Ol, árıne, elordalyq óner ıesi Aıkerim Tileýbek.

Baıqaýdyń qorytyndysyn anyqtaý barysynda uıymdastyrýshylar – "DımashAlı" prodıýserlik ortalyǵy men shaqyrylǵan sarapshylar kádimgideı qıyn jaǵdaıǵa tap boldy. Qyzý pikirtalas tún jarymyna deıin jalǵasty. Nátıjesinde tóreshiler alqasy ymyraǵa kelip, eki qatysýshyǵa bas júlde beretin bolyp sheshti. Al júlde qorynyń kólemi aldyńǵy konkýrstan eselep artty.

 

Aıta ketý kerek, Qazaqstanda osyndaı aýqymdy is-shara Aqtóbe oblysy ákimdiginiń jáne Aqtóbe qalasyndaǵy jeke kompanııalardyń qoldaýymen ótti. Baıqaý aldynda Aqtóbe oblysynyń ákimi Ońdasyn Orazalın qazylar alqasy múshelerimen jáne festıval-baıqaýdy uıymdastyrýshylarmen kezdesti.

«Daryndy balalardyń "Baqytty bala" atty óner básekesi halyqaralyq mártebege ıe boldy. Sonyń arqasynda qazaqstandyq óner ólkesindegi órender álemge belgili jerlesimiz Dımash Qudaıbergen sııaqty esimderin tanyta bastady. Festıval-baıqaýdyń ondaǵan, júzdegen jańa juldyzdardy ashatynyna senimim mol", - dep atap ótti oblys ákimi.

Kezdesý sońynda aımaq basshysy qonaqtarǵa estelik kádesyılar tabys etti.

Baıqaý bolatyn kún «Dımash Qudaıbergen gala-shoýǵa bir kúnge ushyp keldi» degen qýanyshty habardan bastaldy. Balalar qobaljyǵanyn jasyra almady, olardyń árqaısysy úshin ózderiniń súıikti ánshisimen kezdesý – úlken arman. Biraq jetkinshekter ishki sezimge toly tolǵanystaryn basyp, sahnada úzdik óner kórsetýge janyn da, baryn da salyp baqty. Óz ana tilinde án shyrqaýdy talap etetin birinshi saıystyń ózinde kórermender úshin jeńiske úmitker anyqtalǵandaı boldy. Nur-Sultan qalasynan kelgen Aıkerim Tileýbek "Jumaq meken" ánimen tyńdarmandardy baýrap aldy, kópshilik oǵan uzaq ýaqyt boıy qol shapalaqtap, ystyq yqylastaryn bildirdi.

Álemdik deńgeıdegi tanymal hıtterdiń perfomanstary oryndalatyn ekinshi kezeńde uıymdastyrýshylar jas shamasyna shekteý qoımaǵanyn atap ótken jón. "DımashAlı" prodıýserlik ortalyǵynyń jetekshisi Qanat Aıtbaev aıtqandaı, munda qatysýshylar ózderiniń vokaldyq qabiletteri men sahnalyq talanttaryn meılinshe aıqyn kórsetetin ánder tańdaýy óte mańyzdy.

"Balalar tamasha óner kórsetti! Tamashasy sol, tipti shyn myqtyny tańdaý men anyqtaý asa qıynǵa soqty. Alaıda, baıqaý sharttary da oryndalýy tıis. Qazylar alqasy eshkimdi alalamaı, óz mindetterin adal atqardy dep bilemin. Sońynda erekshe qorytyndy shyǵardy", - dedi baıqaýdyń qazylar alqasynyń múshesi Aıda Nıkolaıchýk.

Júldegerlerdi sońynan bastap tanystyrsaq, qostanaılyq Isataı Boltahan jáne Almaty qalasynyń úmitkeri Qaraqat Bashanova júldeli úshinshi oryndy qanaǵat tutty. Olardyń árqaısysy 100 000 teńge somasynda syılyq sertıfıkatpen marapattaldy. Ekinshi orynǵa Ýkraınanyń Harkov qalasynan kelgen Darına Galıkaıa men aqtóbelik Ańsar Júsip laıyq dep tanyldy. Olarǵa 150 000 teńge kólemindegi sertıfıkattar tabys etildi. Al birinshi oryndy Reseıdiń Týla qalasynan kelgen Marııa Panıýkova men

almatylyq Nurlybek Saparbaı jeńip aldy. Básekelesterinen óner báıgesinde oza shapqan jas ánshiler 250 000 teńge kólemindegi sertıfıkattarǵa ıe boldy.

Segiz memleketten kelgen tańdaýly ánshilerdiń armanyndaǵy Bas júlde, dástúr boıynsha, sarapshylar alqasyn tamsandyryp, ǵajap ónerimen konkýrs dárejesin kótergen eń myqty eki qatysýshyǵa tabystaldy. Olar, joǵaryda aıtqanymyzdaı, elordanyń týmasy Aıkerim Tileýbek pen Reseıdiń Túmen qalasynan kelgen Islam Balkoev – "Baqytty bala" II ashyq festıval konkýrsynyń jańa qos juldyzy. Bas júldeni jeńip alǵandardyń árqaısysyna 1 000 000 teńge somasynda sertıfıkattar tabys etildi.

Taǵy da aıtaıyq, Islam Balkoev "Pervyı kanal" arnasynan kórsetiletin "Golos. Detı" atty televızııalyq joba boıynsha kópshilikke tanymal. Reseıdiń basty vokaldyq shoýynda Valerıı Meladzeniń jetekshiligimen óner kórsetý Islamǵa kóp kómegin tıgizdi. Onyń ónerine pikir bildirgen Qazaqstannyń eńbek sińirgen mádenıet qaıratkeri, Dımashtyń pedagogi Marat Áıtimov bylaı dedi: "Islam talantymen qatar, erekshe daryny men sahnalyq sheberligin tanyta bildi. Álbette, onyń sahna adamy ekeni daýsyz! Ol aýdıtorııamen jumys isteı alady, sahnanyń sánin keltirdi. Naǵyz ártis úshin jaqsy vokaldyq qabileti bolý jetkiliksiz, naǵyz ártis san alýan qasıetterge ıe bolýy tıis, eń bastysy – ándi Dımashtaı júrekpen jetkize bilý qajet.

Mysaly, sheberlik saǵaty barysynda men Islamǵa onyń horeografııasyna qatysty birneshe eskertý jasadym. Bıi shıkileý boldy, ashyǵyn aıtqanda, onyń deńgeıine laıyq emes edi. Is-qımyldary sál qysyńqy bolatyn. Islam meni muqııat tyńdap, pysyqtaýǵa ýáde berdi. Sóıtip, fınal kezinde múldem jańa qoıylymymen tánti etti! Osyndaı qysqa merzimde ol barlyq kemshilikterdi joıyp, bıdi jaqsy alyp shyqty. Bul, álbette onyń joǵary kásibıliginiń kórsetkishi".

Aıkerim Tileýbek Dımash Qudaıbergenmen birge onyń kelesi konertinde án shyrqaý qurmetine ıe bolǵany belgili boldy.

Eske sala keteıik, "Baqytty bala" festıval konkýrsynyń I maýsymynyń fınalısi Narǵyz Januzaq Londonda ótken Indigo at the O2 konert zalynyń sahnasynda áıgili ánshimen birge mega-juldyzdarmen dýette óner kórsetti. Al ekinshi Bas júlde ıegeri Erjan Maksımm reseılik "Golos. Detı" tanymal jobasynda máskeýlik kórermenderdi darynymen tamsandyra bildi.

Sońǵy jańalyqtar