4 Shilde, 12:56 216 0 Nur Otan Tańsulý ALDABERGENQYZY

«Óńirge et kombınaty kerek»,– deıdi oblys ákimi sharýa qojalyǵyndaǵy júzdesýinde

Elbasymyzdyń jyl saıynǵy halyqqa úndeýinde turaqty túrde aıtylyp kele jatqan máselelerdiń biri – aýyl turǵyndarynyń jaǵdaıyn jaqsartý. Osy rette «Agroónerkásiptik keshendi 2017-2021 jyldarǵa arnalǵan baǵdarlamasy aıasynda «Jumyspen qamtýdyń jol kartasy» baǵytynda «Aýyldaǵy jumys orny» jańa jobasy ómirge kelgeni belgili. Onda úkimetke jergilikti ákimdermen birlesip, eldi mekenderde aýylsharýashylyǵy ónimderin ótkizý jáne qaıta óńdeýdi qamtamasyz etetin kooperatıvter uıymdastyrý jóninde sharalar qabyldaýdy qatań tapsyrǵan bolatyn. Ásirese, «Kooperaııalar týraly» zańnyń qabyldanyp, bekitilýi biraz óńirlerdegi shaǵyn jáne orta kásippen aınalýshylar qataryn arttyrdy.

Elimizdiń aýylsharýashylyǵy ónimderin ósirip, satýmen qatar mal sharýashylyǵynyń ónimderin de qatań nazarda ustaýy zańdylyq. Óıtkeni, Qazaqstanda etti mal sharýashylyǵyn damytý agrarlyq salanyń basym baǵyttarynyń biri bolyp tabylady. Osy rette Qaraǵandy oblysyndaǵy atqarylyp jatqan tirlikterge toqtala ketýdi jón sanadyq. Oblystyń agroónerkásip kesheni salasy óndiris­tiń ósýimen, aýyldarda qarjy qyzmetiniń damýymen, aýyl turǵyndarynyń ómir súrý deńgeıiniń ósýimen sıpattalady. Ol úshin jyl saıynǵy ósim malynyń ishki jáne syrtqy satylymdaryn retke keltirý jaqsy nátıjege qol jetkizetini belgili. Sondyqtan da bıyl Ózbekstanǵa mal sharýashylyǵy ónimderiniń eksportyn kúsheıtý maqsatynda «Jáke» sharýa qojalyǵy 28 myń buqa jetkizý týraly kelisim-shart jasaǵan. Biraq tapsyrys berýshilerdiń suranysy boıynsha árbir buqanyń salmaǵy 400 keliden kem bolmaýy kerek.

Aımaq ákimi Erlan Qoshanov «Jáke» sharýa qojalyǵynyń bordaqylaý alańynda bolyp, kásiporynnyń búgingi tyndyrǵan tirlikteri men aldaǵy josparlaryna qanyq boldy. Jıyrma gektar aımaqta mal qoralary men basqa da óndiristik úı-jaılary ornalasqan iri qara malyn bordaqylaýǵa arnalǵan bul alań Buqar Jyraý aýdanyna qarasty Úshtóbe aýyldyq okrýginde ornalasqan. Jańa tehnologııa zamanyna sáıkesten­dirilgen bul jerde mal jemderin taratý mehanıkalandyrylǵan, sýarǵyshtary da avtomatty júıe boıynsha áreket etedi.

– Eki jyl ishinde óndiris kólemin 5500 basqa deıin ósirdik. Aldaǵy ýaqytta bul kórsetkish 10 myń basqa deıin kóbeıtip, jylyna 40 myń bas bordaqylanǵan buqalardy satýǵa shyǵaramyz degen maqsat bar,– deıdi kásiporyn ókili A.Syzdyqov.

Kásiporynnyń mal sharýashylyǵy ónimderin eldiń ishki naryǵymen qatar shetelge de satýǵa múmkindigi bar. Eksporttyq jetkizilimder eki baǵytta júredi. Sharýa qojalyǵynyń ónimderi Ózbekstan men Iranǵa shyǵarylady. Al «Sybaǵa» baǵdarlamasy boıynsha Reseıden 5000, Polshadan 2000 bas iri qara satyp alýdy josparlap otyr. Satyp alynatyn iri qaralardyń genetıkasyn jaqsartý jumystary da nazardan tys qalǵan emes. Osy rette «Jáke» sharýa qojalyǵy mal sharýashylyǵynyń ónimderin arttyrý maqsatynda jergilikti fermerlermen de tyǵyz baılanys ornatqan.

– Óńirge et óńdeý kombınaty óte qajet. Búginde «Qarapaıym zattardyń ekonomıkasy» atty jańa baǵdarlama paıda bolyp, memlekettik qoldaý joldary qarastyrylýda. Sondyqtan da qolda bar múmkindikti paıdalaný kerek, – dedi oblys ákimi.

Ótken jyly Elordamyzda uıymdastyrylǵan Qaraǵandy oblysy aýylsharýashylyǵy ónimderiniń jármeńkesinde 98 tonna – et, 12 tonna – sút ónimderi, balyq – 5, kartop – 350, 75 tonna kókónispen qatar 360 myń dana jumyrtqa satylyp, sonymen qatar aýylsharýashylyǵy ónimderiniń bul is-sharasynda baýyrsaq pen qymyz festıvali de uıymdastyrylǵany osyndaı kásiporyndar eńbeginiń jemisi ekeni daýsyz.

Tańsulý ALDABERGENQYZY

Sońǵy jańalyqtar