11 Shilde, 10:30 462 0 Qaýipsizdik Turkystan Support

  Sýdıalardyń qyzmettik sapasy  artady

Qazaqstanda qyrkúıekten bastap sýdıalardyń qyzmettik sapasyn baǵalaý qolǵa alynady. Bul týraly  sýdıa­lardyń keńeıtilgen keńesinde QR Joǵarǵy sotynyń tóraǵasy Jaqyp Asanov málimdedi.

«Sýdıa bolam deýshilerdiń sany bıyl 2 ese ósti. Buryn óz erkimen ketken sýdıalar ózgeristerdi kórip, qaıta sýdıa bolamyn dep  konkýrstarǵa qatysýda. Tipti bala kútimine baılanysty demalysqa shyqqan áriptesterdiń ózi jaǵdaıdy kórip, jumysqa qaıta shyǵýǵa sheshim qabyldap jatyr», – dedi J.Asanov. Joǵary sot tóraǵasy bıyldyń ózinde 434 sýdıanyń synaqtan ótetinin atap ótti. «Biz soǵan arnaıy komıssııa qurdyq. Ishimizdegi eń abyroıly sýdıa­­lardy  sonyń quramyna engizdik. Tamyz aıynyń ishinde júıemizdi, ádistememizdi bekitemiz. Sol ádisteme boıynsha árbir sýdıanyń qyzmettik sapasyna  baǵa beretin bolamyz. Bıyldyń ózinde 434 sýdıa osy synaqtan ótedi. 2,5 aıdyń ishinde aýdandyq sottardyń 80 paıyzy osy baǵalaýdan ótýi kerek. Jalpy, sotty jańǵyrtamyz desek  qolǵa alatyn eń basty másele – sýdıalyq kadrlar. Osy problemany túbegeıli sheshpesek, zań da, myqty sot reformasy da eshqandaı nátıje bermeıdi, jaǵdaıdy túzemeıdi», – dedi Joǵarǵy sot tóraǵasy.

Sonymen qatar J.Asanov Parlament qaraýynda sot qyzmetine baılanysty jeti birdeı zańnyń jatqandyǵyn atap ótti.  «Byltyrdan beri bizde óte kóp shara boldy. 10-nan astamy tikeleı efırde ótti. Sol kezde «Joǵarǵy sottyń basshylary nege kóp sóıleı beredi, kóp sóılegenshe sonyń barlyǵyn iske asyrmaı ma?» degen áńgimeni estidik. Árıne, onyń barlyǵyn biz aıta almadyq. Biraq onyń sebebi boldy. Eń basty sebebi biz ózimizdiń baǵdarlamalarymyzdy jazǵannan keıin jaǵdaıdy jaqsartý úshin biraz zańdy ózgertý qajettiligi paıda boldy. Al endi ony ózgertý úshin sol máselege qatysty barlyq  memlekettik organdardyń, basqa qurylymdardyń kelisimi kerek. Keıbir memlekettik qurylymdar bizben kelispeı qarsylyq bildirip jatty. Sondyqtan biz kóp sóıleýge májbúr boldyq. Óıtkeni ózimizdiń ustanymymyzdy dáleldeý kerek boldy», – dedi ol 2019 jyldyń 1 jartyjyldyqtaǵy sot tóreligin júzege asyrý qorytyndysy qaralǵan keńeste.

Sońǵy jańalyqtar