11 Shilde, 10:11 398 0 Óner Ásel ÁNÝARBEK

«Nur Suńqar» júldegerleri  anyqtaldy

Keshe Nur-Sultan qalasynda  onynshy márte uıymdastyrylǵan dástúrli «Nur Suńqar» baıqaýy júldegerleriniń esimderi belgili boldy. «Nur Otan» partııasy jarııalaǵan baıqaýdyń qorytyndysyna saı óz isinde ozat dep tanylǵan tilshiler marapattaldy.

«Nur Suńqar» baıqaýy 2010 jyldan beri jyl saıyn ótkizilip keledi. Osy jyldar ishinde konkýrsty ótkizý úlgisi, erejesi, ondaǵy atalymdar men júldeler de ózgertilip, jetildirildi. Búginde bul baıqaý medıa salasynyń qyzmetkerlerin yntalandyrýǵa baǵyttalǵan bedeldi is-sharalardyń qataryna endi. Alaıda konkýrstyń áý bastaǵy maqsaty ózgergen joq. Baıqaý qazaqstandyq jýrnalısterdi, blogerler men shyǵarmashylyq ujymdardy  qoldaý, olardyń otandyq kásibı jýrnalıstıkany damytýǵa, qoǵamdy jedel ári obektıvti aqparatpen qamtamasyz etýge qosqan úlesin baǵalaýdy maqsat etedi.

Onynshy márte uıymdastyrylǵan baıqaýdyń marapattaý saltanatynda «Nur Otan» partııasy Tóraǵasynyń Birinshi orynbasary Baýyrjan Baıbek: «Jańa tehnologııalar damyp keledi, suranys ózgerýde. Kóp adamdar aqparatty áleýmettik jeliden alady. Kez kelgen adamda óz pikirin, oıyn áleýmettik jeli arqyly halyqqa jetkizý múmkindigi bar.  Degenmen, kásibı jýrnalısterdiń mańyzdy róli halyq úshin óte qajet», – dedi.

QR Aqparat jáne qoǵamdyq damý mınıstri Dáýren Abaev jýrnalısterdi quttyqtap, jyly lebizin bildirdi. «Búgingi mańyzdy oqıǵamen barlyqtaryńyzdy quttyqtaımyn. «Nur Suńqar» syılyǵy medıa-landshafty ózgertti dep aıtýǵa bolady. Bul turǵyda oń nátıje jalǵasyn tabady dep senemin. Úzdikter laıyqty marapattarǵa qol jetkize bersin», – dedi mınıstr.

Uıymdastyrýshylardyń aıtýynsha, bıyl konkýrstyń uıymdastyrý komıtetine 207 qatysýshydan myńǵa jýyq jumys kelip tústi. Jeńimpazdar 10 atalym boıynsha anyqtaldy. Sonymen, komıssııa sheshimimen «Halyq daýysy» nomınaııasy boıynsha «Qazaqstan» ulttyq arnasyndaǵy «Apta» baǵdarlamasynyń redaktor-sarapshysy Aıbek Qobdabaı úzdik televızııalyq jýrnalıst atandy. Al «Tochka zrenııa» atalymyn «Habar24» arnasynyń shyǵarýshy redaktory Juraǵat Baman jeńip aldy. «Sóz zergeri» nomınaııasy boıynsha «Egemen Qazaqstan» gazeti bas redaktorynyń orynbasary Ǵabıt Músirep úzdik gazet jýrnalısi dep tanyldy. «Lıter» respýblıkalyq qoǵamdyq-saıası gazetiniń tilshisi Talǵat Isenov «Master slova» atalymy boıynsha marapattaldy. Internet basylymdary jýrnalısteriniń arasynda Bnews.kz aqparat agenttiginiń bas redaktory Aqmaral Oljabaeva «Medıa-profı» nomınaııasyn jeńip aldy. «Jas serpilis» nomınaııasy «Habar» arnasy saraptamalyq baǵdarlamalar bóliminiń tilshileri Sáken Mahametkerimov pen Nazymgúl Kúmisbaevaǵa buıyrdy.

Sonymen qatar, «Nur Suńqar» baıqaýynyń uıymdastyrýshylary usynǵan Elbasy qyzmetin erekshe jaryqqa shyǵarǵan «Kazahstanskaıa pravda» gazetiniń arnaıy tilshisi Igor Prohorov «Elbasy salǵan sara jol» nomınaııasyna ıe boldy. Al «Partııa jobalary jaıly jaryq kórgen eń jaqsy jarııalanym» úshin «Astana» telearnasynyń aqparattyq-saraptamalyq baǵdarlamalar qyzmetiniń arnaıy tilshisi Ekaterına Brynıýk pen «Aıqyn» gazetiniń sholýshysy Gúljan Rahman marapattaldy. Sondaı-aq, «Jetisý» telearnasynyń qyzmetkeri, belgili telejýrnalıst Nurtileý Imanǵalıulyna otandyq jýrnalıstıkanyń damýyna qosqan úlesi úshin «Maıtalman» nomınaııasy tabystaldy. Qoǵamdyq sanany jańǵyrtý baǵdarlamasyn nasıhattaýǵa qosqan úlesi úshin taǵaıyndalǵan «Rýhanı jańǵyrý» atalymy «Astana» telearnasynyń atqarýshy prodıýseri Bazarkúl Otynshıeva men «Abaı» jýrnalynyń tilshisi Aıgúl Kemelbaevaǵa buıyrdy.

 

Sońǵy jańalyqtar