9 Shilde, 17:03 395 0 Syrtqy saıasat Dınara MYŃJASARQYZY

BUU: 2017 jyly otbasydaǵy zorlyq-zombylyqtan 50 myń áıel kóz jumdy

BUU-nyń esebinshe, 2017 jyly álemde 50 myń áıel men jas qyz otbasyndaǵy zorlyq-zombylyq saldarynan kóz jumǵan. Bir jyldyń ishinde álemde 87 myń áıel erinen zábir kórgen. Bul týraly BUU 8 shildede jarııalaǵan esirtki jáne qylmys jaıly esebinde aıtylǵan.

BUU 2017 jyly áskerı qaqtyǵystardyń saldarynan álemde 89 myń adam mert bolǵanyn málimdedi.

Esep avtorlary 2017 jyly 2012 jylmen salystyrǵanda otbasydaǵy zorlyq saldarynan qaıtys bolǵandar sany óskenin aıtady. BUU dereginshe, áıelderdi zorlaý faktisi Azııada (20 myń) kóp tirkelgen. Afrıkada – 19 myńnan astam áıel, Amerıkada – 8 myń, Eýropada 3 myń áıel eriniń qolynan qaza tapqan.

Qazaqstanda da jyl saıyn myńdaǵan áıel otbasyndaǵy zorlyq-zombylyqtan zardap shegedi. Qazaqstan bas prokýratýrasy dereginshe, 2016 jyly elde otbasyndaǵy zorlyq-zombylyqtan 36 áıel men bir bala qaza bolǵan. Áıelder quqyǵyn qorǵaıtyn uıymdar erinen taıaq jeıtin áıelderdiń sany resmı statıstıkadan da kóp dep sanaıdy. Quqyq qorǵaý uıymdarynyń málimdeýinshe, Qazaqstanda kúıeýinen taıaq jegen áıelder máselesin ashyq aıtyp, sotqa shaǵymdana bermeıdi, sondyqtan mundaı jaıttar kóbine ashylmaı qalady.

2017 jylǵy shildede Qazaqstan "Uryp-soǵý" jáne "Densaýlyǵyna qasaqana jeńil zaqym keltirý" baptary ákimshilik quqyq buzýshylyq týraly kodekske aýystyrylǵan. Jyl basynda ishki ister mınıstrligi (IIM) turmystaǵy zorlyq-zombylyqtyń aldyn alýǵa qatysty ahýaldyń nasharlap ketýine siltep, otbasyndaǵy uryp-soǵýdan qylmystyq sıpatty alyp tastaýdy usynǵan. Quqyq qorǵaý uıymdary Qazaqstan bıliginen bul otbasyndaǵy uryp-soǵý oqıǵalaryna qaıtadan qylmystyq sıpat berýdi talap etken. Biraq bılik olardyń sózine qulaq aspady.

Sońǵy jańalyqtar