5 Shilde, 12:24 512 0 Ádebıet "Túrkistan" gazetiniń avtorlary

«Kóshbasshylyq» – kerek kitap

Sońǵy kezde barlyq elde motıvaııalyq baǵyttaǵy kitaptar kóptep shyǵyp jatyr jáne olar úlken suranysqa ıe. Sebebi adamnyń qabiletin ashýǵa paıdasy zor, Aıbergenovshe aıtqanda, «Janam degen júrekke ot beretin» ondaı dúnıeler jańa zamannyń jańa adamdaryn qalyptastyratyny sózsiz.

Kúlli álemdik bul úderisten Qazaqstan da syrt qalǵan joq. Bizdiń elimizde de iskerlik álippesi, kóshbasshylyq qaǵıdalary syndy adamdy jan-jaqty damytatyn kitaptar jaryq kórip, oqyrmandaryn taýyp jatyr.

Sondaı kitaptyń biregeıi – «Mazmundama» qorynyń jetekshisi, jýrnalıst Shyńǵys Muqannyń «Kóshbasshylyq» atty kitaby. Taıaýda Almaty qalasynda tanystyrylymy ótken kitap 3 myń danamen qazaq jáne orys tilderinde jaryq kórgen. Kitap ıesiniń aıtýynsha, kitapta jeke tulǵalardy jáne jalpy qoǵamdy damytatyn nebir ıdeıalar bar.

Shyńǵys Muqan óz kitaby týraly bylaı deıdi: «Sońǵy eki jylda Amerıkada oqyp, kóptegen taqyryptardy zerttedim, kóptegen kitaptardy oqydym. Onyń ishinde lıderlik taqyryby ózime qatty unady. Osy taqyryptaǵy myqty sheteldik kitaptardy oqyp otyryp, ondaǵy ıdeıalarǵa tań qaldym. Jáne osylardy nege qazaqshaǵa aýdarmasqa dep zertteı bastadym. Sóıtsem, aǵylshyn tilinde kóshbasshylyq týraly 7,5 myń kitap shyqqan eken. Sonyń ishinen myqty degen on kitaptyń qaımaǵyn qalqyp alyp, bir kitapqa mazmundap syıǵyzdyq. Sonymen qatar bul kitapty oqyǵan adam tildi de úırenedi, ıaǵnı oryssha, aǵylshynsha sózdermen sózdik qoryn toltyryp otyrady».

Kitaptyń tanystyrylymyna jazýshylar, aýdarmashylar men jýrnalıster qatysyp, «Kóshbasshylyq» kitaby týraly oılaryn aıtyp jatty. QR prezıdentiniń keńesshisi Maqsat Sqaq kitaptyń el azamattary úshin óte qajet dúnıe ekenin aıta kelip, sózin bylaı tujyrdy:

«Bizden talaı oıshyldar shyqty. Jer kólemi boıynsha álemde alǵashqy toǵyzdyqqa kiretin mundaı jerdi aqylsyz el ıelenip, saqtap qala almaıdy. Ol úshin myqty rýh kerek. Rýh degenimiz – kóshbasshylyq. Kóshbasshy kez kelgen jaǵdaıda ulttyń ishinen sýyrylyp shyǵady. Degenmen men, osy kóshbasshylyqty ulttyq tereńdigimizben baılanystyrǵym keledi. Qazaq bar nársege kóńil bólgen, bizdiń ulylyǵymyz sonda. Qunarly jerden ǵana úlken dúnıeler shyǵady».

Sonymen qazaqqa arnalǵan zamanaýı úrdisterdi túsindiretin jáne keýdesinde oty barlardy alǵa umtyldyratyn taǵy bir kitap oqyrmanǵa jol tartty.

 

A.JUMAǴALIULY

 

Sońǵy jańalyqtar