27 Maýsym 2019, 14:12 944 0 Ishki saıasat Túrkistan Gazeti

El kútken eren Jarlyq

Kúni keshe Prezıdent Qasym-Jomart Toqaev áleýmettik jaǵdaıy tómen Qazaqstan Respýblıkasy azamattarynyń borysh júktemesin azaıtý jóninde Jarlyqqa qol qoıdy.

Osydan 15 kún buryn ulyqtaý rásiminde Qasym-Jo­mart Kemeluly halyqtyń áleýmettik turmys jaǵdaıy tómendep ketkendigine toqtalyp, tıisti sharalar qoldanatynyn aıtqan-dy. Onyń ishinde bankterge bereshegi artqan turǵyndar taǵdyry da nazardan tys qalmaǵan edi. Ulyqtaý rásiminde «Halyqty tolǵandyryp otyrǵan basty másele – tabys kóleminiń azaıýy. Halyqaralyq qarjy naryqtarynyń turaqsyzdanýy, teńgeniń devalvaııasy halyqtyń tabysyna keri áser etti. Mıllıonnan astam azamattarymyz bankten nesıe alýǵa májbúr boldy. Tabysy joǵary jáne tómen azamattardyń arasyndaǵy alshaqtyq – bizdiń qoǵamdy mazalaıtyn taǵy bir ózekti másele. Árıne, mundaı qubylystar búkil álemde bar, degenmen toqmeıilsip otyra berýge bolmaıdy. Sondyqtan, dál osy ótkir áleýmettik-ekonomıkalyq jáne saıası máseleni sheshý úshin ortamerzimdi keshendi sharalar qabyldaý qajet», – degen bolatyn Qasym-Jomart Toqaev.

Prezıdenttiń sońǵy qaýlysynda áleýmettik kómekke aıryqsha zárý azamattardyń ekinshi deńgeıli bankter men mıkroqarjy uıymdarynan alǵan qaryzdaryna jeńildik bolatyny aıtylǵan. Óz kezeginde kópbalaly otbasylar, asyraýshysynan aırylý jaǵdaıyna baılanysty tólem alatyn otbasylar, múgedek balalary bar, 18 jastan asqan, bala jasynan múgedekter bar otbasylar, ataýly memlekettik áleýmettik kómek alatyndar, jetim balalar, ata-anasynan kámelettik jasqa deıin aırylǵan, jıyrma toǵyz jasqa tolmaǵan, ata-ananyń qamqorlyǵynsyz qalǵan balalar beresheginen bosatylady. Biraq qaryz boıynsha jalpy bereshegi 2019 jylǵy 1 maýsymdaǵy jaǵdaı boıynsha úsh mıllıon teńgeden aspaý kerek. Sondaı-aq, bir qaryz alýshyǵa 2019 jylǵy 1 maýsymdaǵy jaǵdaı boıynsha negizgi boryshy úsh júz myń teńgeden aspasa birjolǵy tártipte qaryzdar óteletin bolady. Qasym-Jomart Toqaevtyń qaýlysyna sáıkes Qazaqstan Respýblıkasynyń Úkimeti men Qazaqstan Respýblıkasynyń Ulttyq Banki bankterde jáne mıkroqarjy uıymdarynda kepilsiz tutynýshylyq qaryzdary bar joǵaryda aıtylǵan Qazaq­stan Respýblıkasy azamattarynyń 2019 jyl­ǵy 1 shil­dedegi jaǵdaı boıynsha eseptelgen aıyppuldary men ósimpuldaryn esepten shyǵarady.

 

 

Ómirlik qıyn jaǵdaıda qalǵan Qazaqstan Respýblıkasy azamattarynyń borysh júktemesin azaıtý jóninde ýaqtyly kómek kórsetý maqsatynda QAÝLY ETEMIN:

 

  1. Qazaqstan Respýblıkasynyń Úkimeti ekinshi deńgeıdegi bankterdegi jáne mıkroqarjy uıymdaryndaǵy kepilsiz tutynýshylyq qaryzdary boıynsha mynadaı jaǵdaılarda:

1) atalǵan qaryzdar boıynsha boryshkerler kópbalaly otbasylar, asyraýshysynan aırylý jaǵdaıyna baılanysty tólem alatyn otbasylar, múgedek balalary bar, 18 jastan asqan, bala jasynan múgedekter bar otbasylar,  ataýly memlekettik áleýmettik kómek alatyndar, jetim balalar, ata-anasynan  kámelettik jasqa deıin aırylǵan, jıyrma toǵyz jasqa tolmaǵan, ata-ananyń qamqorlyǵynsyz qalǵan balalar;

2) qaryz boıynsha  jalpy bereshegi 2019 jylǵy 1 maýsymdaǵy jaǵdaı boıynsha 3 000 000 (úsh mıllıon) teńgeden aspaıtyn bolsa;

3) bir qaryz alýshyǵa 2019 jylǵy 1 maýsymdaǵy jaǵdaı boıynsha negizgi boryshy men oǵan eseptelgen syıaqydan turatyn óteletin beresheginiń mólsheri  300 000 (úsh júz myń) teńgeden aspaıtyn bolsa, olardy óteý boıynsha  birjolǵy tártipte sharalar qabyldasyn.

  1. Qazaqstan Respýblıkasynyń Úkimeti, Qazaqstan Respýblıkasynyń Ulttyq Banki:

1) bankterde jáne mıkroqarjy uıymdarynda kepilsiz tutynýshylyq qaryzdary     bar   Qazaqstan   Respýblıkasy   azamattarynyń   2019   jylǵy 1 shildedegi jaǵdaı boıynsha eseptelgen  aıyppuldary men  ósimpuldaryn esepten shyǵarý;

2) Nur-Sultan, Almaty, Shymkent qalalarynyń jáne oblystardyń ákimderimen birlesip osy Jarlyqty iske asyrý jóninde ózge de sharalardy qabyldasyn.

  1. Qazaqstan Respýblıkasynyń Ulttyq Banki ózine shekten tys táýekelderdi alǵan qarjy uıymdarynyń jaýapkershiligin kúsheıtý boıynsha:

1)  merzimi ótken bereshegi 90 kúnnen asyp ketken jeke tulǵalardyń barlyq kepilsiz tutynýshylyq qaryzdary boıynsha kredıtti berýmen jáne oǵan qyzmet kórsetýmen baılanysty  turaqsyzdyq aıybyn, komıssııalar men ózge de tólemderdi esepteýge tyıym salýdy;

2) tabysy kúnkóris deńgeıinen tómen azamattarǵa qaryzdar berýge tyıym salýdy;

3) kepilsiz tutynýshylyq qaryzdardy berý kezindegi retteýdiń qosymsha sharalaryn kózdeıtin retteýshilik sıpattaǵy qatań sharalar qabyldasyn.

  1. Osy Jarlyqtyń oryndalýyn baqylaý Qazaqstan Respýblıkasy Prezıdentiniń Ákimshiligine júktelsin.
  2. Osy Jarlyq qol qoıylǵan kúninen bastap qoldanysqa engiziledi.

Qazaqstan Respýblıkasynyń Prezıdenti Q.Toqaev

 

Jadyra ALDABERGENQYZY,  5 balanyń anasy:

64 myń jalaqynyń 59 myńyn nesıege tóleımiz

Prezıdent Qasym-Jomart Toqaevtyń keshegi qaýlysyn estip shyny kerek erekshe qýanyp jatyrmyz. Alǵash ana bolǵanda osylaı qýanǵan shyǵarmyn. Ózim bes balanyń anasymyn. Alla Taǵala synady, basymyzǵa is túsip qınalǵanda, kerek bolyp aqshalaı nesıe aldyq. Osy ýaqytqa deıin balalardyń aýzynan jyryp tólep jatyrmyz. Eki jyldan beri qatty qınalǵanymyzdy qalaı jasyraıyn. Tipti jeýge un da ala almaı qalǵan kúnder boldy. Dúkenniń bárine qaryz boldyq. Sońynda basymyzdaǵy úıdi de kepilge qoıdyq. Men úı sharýasymen otyramyn, jubaıym jarty stavkamen mektepte jumys isteıdi. Alatyn jalaqysy 64 myń teńge bolsa, onyń 59 myńyn nesıege tólep júrmiz. Otbasymyzdaǵy osyndaı qıynshylyq kezeńde qoldaý kórsetkeli jatqan memleketimiz ben Prezıdentimiz Qasym-Jomart Kemelulyna erekshe alǵys bildiremin.

 

Átirkúl Imanberdıeva, pedogog, kópbalaly ana:

Nesıege beretin aqshany balalarymyzǵa beremiz

Prezıdentimizdiń keshe jarııalaǵan qaýlysyna dúıim jurt razy bolyp qaldy dep oılaımyn. Onyń ishinde kópbalaly analar erekshe qýanǵan shyǵar. Tabys tabamyz degenmen de shyǵynnan qashyp, ne aınalyp kete almaımyz. Qajet bolǵan kezde turmystyq qajettilikterge baılanysty memleketten arnaıy nesıe de aldyq. Sol qarjy Memleket basshysynyń qaýlysyna saı keshiriledi degende shyny kerek abdyrap qalǵanymyz ras. Óıtkeni balalarymyz birinen keıin biri erjetip, boıjetip stýdent atanyp jatyr. Balany oqytyp, kıimin kók, tamaǵyn toq etý ata-ananyń paryzy. Sondyqtan bes bala tárbıelep otyrǵan ana retinde jubaıym ekeýmiz balalarymyzdyń oqyp, úlken azamat bolyp erjetkenin qalaımyz. Endigi azynaýlaq qarjymyzdy sol altyndarymyzǵa bólip beremiz dep otyrmyz.

Arman Qalmuhanmetuly

Sońǵy jańalyqtar