25 Maýsym, 15:15 450 0 Bilgenge marjan "Túrkistan" gazetiniń avtorlary

Semeı qalasyndaǵy aspaly kópir

Tamsansań, Semeıdegi aspaly kópirge tamsan. Mundaı kópir TMD-da da joq. Álem elderiniń ózinde saýsaqpen sanarlyq qana. Semeıdiń kórkine kórik qosyp, sáýletin arttyrǵan bul aspaly kópir - Táýelsizdiktiń tól týyndysy.

Bul kópir Ertistiń arǵy jaǵy men bergi jaǵyn ǵana emes, Azııa men Eýropany, qyr men Sibirdi jalǵastyryp jatyr. Semeı qalasyndaǵy aspaly kópir 2000 jyly 17 qazanda salynǵan.

Ertis ózeni arqyly ótetin  kópir qurylysynyń jobasyn usynǵan japondyq Isakavadzıma Harıma Hevı Indastrız Kompanııasy 1998 jyly Úkimet jańa kópir qurylysyn bastaýǵa sheshim shyǵardy.  Qurylysymen, negizinen, japondyq «Aıachaı» fırmasy aınalysty. Japonııada jasalǵan kópir qańqalary aldymen sý jolymen, sosyn temirjolmen Semeı qalasyna tasymaldanǵan. Jalpy, eki el arasyndaǵy kelisimge qaraı, Japonııa memleketi kópir qurylysyna 165 mln dollar bólgen. Bul qarjyny 2,7 paıyzben 30 jylda qaıtarý máselesi de aldyn-ala pysyqtalǵan.

Al Túrkııanyń «AlsımAlarko» fırmasy kópirge kelip tireletin uzyndyǵy 16 shaqyrym jol qurylysyn júrgizýmen shuǵyldandy. Osy arada aıta ketý kerek, kópirdiń ústine tabıǵı asfalt tóselgen. Bul asfalt, biletinderdiń aıtýynsha, Karıb basseınindegi Trınınad kólinen arnaıy tasyp jetkizilgen kórinedi. Sonymen qatar kópir qurylysy jumystaryna óz elimizden 30-ǵa jýyq fırmalar qatyssa, jumysshylardyń 90 paıyzyn jergilikti azamattar qurapty. Kópir qurylysy belgilengen merzimnen buryn aıaqtalyp, 2000 jyldyń qazan aıynda halyqqa paıdalanýǵa berildi.

                        Jaras Nurboluly

 

Sońǵy jańalyqtar