20 Maýsym, 13:45 448 0 Jahan Ásel ÁNÝARBEK

Meksıkadaǵy mıgranttarmen kúres

Álemde bosqyndarmen kúres máselesi áli de ózekti bolyp tur. Kúni keshe Meksıka bıligi el aýmaǵyna zańsyz kirgen 76 kýbalyq mıgrantty otanyna qaıtardy.

Apta basynda Meksıkanyń quqyq qorǵaý organdary zańsyz mıgranttar mingen 4 júk kóligin ustap, sonyń nátı­­jesinde 800 mıgrantty qolǵa túsirdi. Árbir júk kóligine 200 adamnan mingen kórinedi. Olardyń arasynda áıelder men balalar da bar. Oqıǵanyń jaı-japsaryn anyqtaý úshin kólik júrgizýshileri federaldy prokýratýraǵa jetkizildi. Jarııalanǵan málimetterge súıensek, Ortalyq Amerıkadan shyqqan mıgranttar saparǵa Vılıarmos qalasynan at­ta­nypty. Júr­gizýshilerdiń qolynda kólikke kókónis tıelgendigin rastaıtyn jalǵan qujat bolǵany anyqtaldy. Al mıgranttar olarǵa eldiń soltústigine jetý úshin 3,5 myń dollar tólegen.

Sondaı-aq, Meksıka bıligi  Gondýrastan kelgen 105 mıgrantty eline keri qaıtardy. Olardyń 63-i kámelettik jasqa tolmaǵandar. Bosqyndar eldiń Verakrýs shtatynan ushaqqa otyrǵyzylǵan. Buǵan deıin aımaqtan 300-ge jýyq Gondýras azamaty deportaııalanǵan edi. Eske sala keteıik, mamyrdyń sońynda AQSh prezıdenti Donald Tramp «Meksıka zańsyz mıgranttarmen kúrespeı otyr» dep, bul elden keletin taýarlarǵa 5 paıyz baj salyǵyn engizetinin jarııalaǵan. Sodan beri Meksıka bıligi máseleni sheshý úshin shuǵyl sharalar qabyldap, qos memleket saýda jáne mıgranttar boıynsha ortaq  kelisimge keldi. Sol kelisimniń bir bólimi – Amerıka Qurama Shtattaryna baǵyttalǵan bosqyndar aǵynyn azaıtý. Qujatqa saı, Meksıka, Salvador, Gvatemala jáne Gondýras elderi Ortalyq Amerıkadan kelgen mıgranttardy tirkeýge alyp, kómek kórsetýi tıis. Al buǵan kelispeı bosyp júrgenderdi, AQSh aýmaǵyna ótpek bolǵandardy qınap, eline qaıtarady. Bul jańalyqtan soń, mıgranttardyń basym bóligi tirkeýden ótýge Mehıkoǵa aǵylyp jatyr. Al AQSh keli­simniń tıimdiligin tekserý maqsatynda Meksıka bıligine 45 kún ýaqyt berdi.

Sońǵy jańalyqtar