17 Maýsym 2019, 13:44 798 0 Qoǵam Dınara MYŃJASARQYZY

“Qazaqstan Barysy"  Aqsýatta 2 mln jeńip aldy

Tarbaǵataı aýdanynda Yrǵyzbaı Dosyhanuly atyndaǵy qazaq kúresinen ótken álemdik gran-prı saıysynda qazaqstandyq Aıbek Nuǵymarov top jardy. Bir apta buryn ǵana Nur-Cultan qalasynda ótken “Qazaqstan Barysy” jarysynda oza shapqan balýan bul joly da tuǵyrdyń eń bıik satysynan kórindi.

Álemniń  28 elinen kelgen apaıtós palýandar arasynda aqtyq synda Aıbekpen ózbekstandyq  Muqsın Hısamedınov aıqasqan bolatyn. Jalpy fınaldyq kezdesý Aıbekke ońaı tıgen joq. Beldesý aıaqtalǵannan keıin Aıbek  óz oıymen bólisti.

“Qazaqstan Barysy” týrnırinen keıin demalyp úlgergen joqpyn. Túrli basqosýlarǵa, telearnadaǵy túsirilimderge qatysyp, sharshaǵanymdy baıqadym. Bizdiń óńirde ótip jatqan jarys bolǵan soń, uıymdastyrýshylar qolqa saldy. Bas tarta almadym, elimniń namysyn abyroımen qorǵaǵanyma qýanyshtymyn. Maǵan qoldaý bildirgen Aqsýat jurtshylyǵyna rahmet. “Tuǵyry bıik-Tarbaǵataı” atty óner jáne sport festıvalin ótkizip jatqan Talǵat Mazbaev, Dýlat Tastekeev aǵalaryma alǵys bildiremin”,- dedi A.Nuǵymarov.

Týrnırdiń 70, +80 keli salmaqtarynda Tájikstan, Grýzııa elderinen kelgen balýandar jeńiske jetti. Jeńimpazǵa uıymdastyrýshylar 2 mln teńge, ekinshi orynǵa 1 mln, úshinshi oryn alǵan sportshyǵa 500 myń teńge tabystady. Sportshylardy ataqty boksshy Qanat Islam, aqyn Júrsin Erman, Aqsýat aýylynyń qurmetti azamaty Tursyn Tastekeevter marapattady.

Qazaq kúresi týrnıri aıaqtalǵannan keıin Qazaq Promotions kompanııasynyń uıymdastyrýymen kásipqoı boks keshi ótti. Qazaqstandyq Eldııar Qamshybekov, Nurlan Saparbaı, Nursultan Amanjolov sekildi qazaq boksshylary sharshy alańǵa shyǵyp, jınalǵan jurtshylyqtyń delebesin qozdyrdy.

Sońǵy jańalyqtar